Skandalet e njëpasnjëshme të dopingut, lajmet e vijueshme për sportistë që kanë përdorur substanca të ndaluara, përhapja e tyre e gjerë në sport, i ka shtyrë drejtuesit e atletizmit europian të propozojnë një rishkrim të rekordeve ndërkombëtare.
Kësisoj, pjesa më e madhe e rekordeve botërore në atletikë mund të rishkruhen pas këtij propozimi “revolucionar” nga Federata Europiane e Atletikës.
Drejtuesi i këtij organizmi, Svein Arne Hansen, është shprehur se rekordet botërore janë të pakuptimta nëse njerëzit nuk i besojnë ato.
Më shumë se 100 atletë që kanë garuar në olimpiadat e 2008-s dhe të 2012-s janë dënuar për përdorim dopingu, ndërkohë që atletët rusë janë ndaluar të marrin pjesë në aktivitetet ndërkombëtare nëse nuk i plotësojnë kriteret e ashpra që vërtetojnë pastërtinë e tyre.
Propozimi për rishkrimin e rekordeve botërore duhet të pranohet nga organizmi qeverisës i atletizmit botëror, IAAF-ja.
Presidenti i Federatës Europiane të Atletikës do t’ia sugjerojë IAAF-së pranimin e propozimit në një takim në gushtin e këtij viti.
“Ajo që propozojmë është revolucionare, dhe jo vetëm sepse shumica e rekordeve europiane dhe botërore do duhet të zëvendësohen. Ne duam t’i ngrejmë standardet për njohje në një pikë ku gjithkush të ketë besim se gjithçka është e ndershme,” thekson Svein Arne Hansen. /tesheshi.com/
