Në një intervistë për AFP-në, kryeministri Haradinaj i ka dhënë nuanca lufte raporteve aktuale të Kosovës me Serbinë, pasi ka kërkuar një Rambujeje të dytë, si një mundësi për heqjen e taksave doganore, e njëherësh mbylljen e ciklit të konfliktit mes dy vendeve, që sipas tij duhet të finalizohet me njohjen e Kosovës nga Serbia.
“Nëse situata bëhet serioze, nëse ne kemi një plan në tryezë që është afër një marrëveshjeje, ne do ta heqim taksën, do t’i japim kësaj marrëveshjeje një shans. Përshembull, nëse ka një konferencë si ajo e Rambujesë apo diçka të ngjashme, me qëllim që të arrihet diçka, atëherë ne do t’i japim një shans. Nuk është në interesin tonë të bllokojmë një marrëveshje mes nesh dhe Serbisë. Por, derisa kjo marrëveshje të arrihet, tarifat do të mbeten në fuqi”,theksoi i pari i qeverisë së Kosovës.
Kundërshtar i ashpër i çdo ndryshimi kufijsh, një tezë që mbrohet nga Thaçi si kusht për paqen, Haradinaj thotë se kjo nuk ka pse ndodh. Mes Kosovës dhe Serbisë gjërat janë të qarta. Duhet thjesht njohja që çon në paqe.
“Për ne është koha që të mbyllim llogaritë dhe të arrijmë një marrëveshje. Është njohja ajo që mbetet. Nuk kemi më çështje të hapura mes Serbisë dhe Kosovës”, deklaroi Haradinaj.
Në gjykimin e tij, çdo debat mbi kufijtë e bën të pamundur një marrëveshje me Serbinë.
“Opsioni apo modeli i një marrëveshjeje që përfshin diskutimin e territoreve dhe kufijve është i rrezikshëm. Ndaj, kjo nuk na sjell më pranë një marrëveshjeje, por na largon”, tha shefi i qeverisë së Prishtinës. /tesheshi.com/
