Socialdemokratët, pjesë e koalicionit qeverisës në Gjermania kanë hedhur idenë për zgjerimin e mundësive të punësimit për njerëzit nga vendet e Ballkanit me qëllim që të ulet numri i azilkërkuesve. Gazeta gjermane “Rhenische Post” bën të ditur se në një dokument për politikën socialdemokrate për azilin, shefat e kësaj partie dhe kryeministrat e landeve kanë rënë dakord edhe për një masë të tillë.
Në këtë dokument, si bën të ditur Deutsche Ëelle, krahas kategorizimit të Shqipërisë, Malit të Zi e Kosovës si “vende të sigurta origjine” për t’i kthyer më shpejt azilantët në vendlindje, bëhet fjalë edhe për mundësi për vizë pune për njerëzit nga Ballkani. Sipas socialdemokratëve, disa individë kanë që tani mundësi të punësohen në ato profesione, për të cilat në Gjermani kërkohet fuqi punëtore, por shumë njerëz nuk e njohin këtë opcion. Socialdemokratët kërkojnë që kusht për këtë vizë pune në Gjermani të jetë një kontratë pune me të ardhura që e kalojnë pagën minimale në Gjermani, 8,5 euro në orë.
Por, kanë mbërritur edhe reagimet e para të partisë kristiandemokrate, CDU që nuk duken tërësisht refuzuese.
Kryeministri i landit të Hesenit nga CDU-ja, Volker Bouffier e cilësoi propozimin të mundshëm për ta diskutuar. “Me dhënien e vizave të punes mund t’u ndihmohet drejtpërdrejt atyre që kanë nevojë, pra ata që largohen nga Ballkani për arsye ekonomike dhe hyjnë në Gjermani me dokumente të rregullta.” /tesheshi.com/
