E djathta zvicerane ka rikthyer në skenë një poster të nëntë vjetëve më parë, që në atë kohë ishte kritikuar si racist e që ishte hequr nga qarkullimi. Këtë herë partia SVP që mban një të tretën e vendeve në parlament e ka rikthyer posterin që tregon një dele të bardhë që shkelmon një dele të zezë, për të bërë fushatë kundër refugjatëve. Posteri ka dalë sërish në dritë nga e djathta zvicerane për të argumentuar deportimin e të huajve që kanë kryer krime.
Partia SVP dëshiron të promovojë një referendum për të miratuar një ligj “të sigurisë” të quajtur “Durchsetzungsinitiativ”. Sipas këtij propozimi, vendi duhet të deportojë të gjithë të huajt që kanë kryer një krim të çfarëdollojshëm, por që të ketë marrë një dënim nga gjykata pavarësisht nëse masa është në ditë apo dhjetë vjet.
Propozimi për ligjin e ri pritet të votohet më 28 shkurt dhe Zyrihu është mbuluar nga posterat me delet e baradha që shkelmojnë ato të zeza, një propagandë që u përcaktua “e rrezikshme” nga Kombet e Bashkuara në vitin 2007.
Megjithatë posteri u përdor herën e dytë në vitin 2010 në një referendum tjetër në lidhje me të drejtën e shtetësisë e tashmë ia kanë hequr pluhurin për të tretën herë për të demaskuar të huajt “e papranueshëm”. Për të mos rënë në sy për mungesë fantazie, të djathtët kanë bërë disa ndryshime të vogla por që nuk luajnë asgjë në imazhin e deleve që zënë me shkelma të ngjashmet e tyre me ngjyrë të zezë.
Në lidhje me ndryshimet: shkelmi i deles më parë qëndronte mbi një flamur zviceran të përgjithësuar, ndërsa tani mbi një kufi hipotetik me ngjyrat e flamurit. E njëjta fushatë për tre çështje të ndryshme. As edhe një përpjekje qoftë e sforcuar fantazie për të fshehur instikte të ulëta. Përgatiti: Juli Prifti – tesheshi.com
