Ashtu siç dhe pritej, kryeministri Rama nuk e ka pranuar propozimin më të fundit të PD-së për një konsenus ndaj reformës në drejtësi. “Propozim i ri apo avaz i vjetër?!”, me këto fjalë e ka komentuar shefi i qeverisë shqiptare ofertën më të fundit të paraqitur nga opozita.
Në arsyetimin e tij refuzues, Rama thotë se mazhoranca që ai drejton është për konsensus për reformën, por nuk mund të pranojë deformim konsensual të thelbit të saj që është garantimi i një procesi rigoroz profesional e të pavarur nga partitë për përzgjedhjen e kandidateve për anëtarë të komisionit të vetingut të prokurorëve dhe gjykatësve.
“Kjo s’është vetëm bindja jonë, por një vijë e kuqe që nuk e ka pikturuar peneli im, po e ka vënë Brukseli dhe Uashingtoni. Dhe është e habitshme që Partia Demokratike vazhdon merret me gishtin, kur gishti tregon hënën! Sepse kështu i bie që jo vetëm unë, po edhe Brukseli e Uashingtoni, nuk e duan reformën”, shkruan Rama. /tesheshi.com/
