Siç njoftojnë burimet turke të lajmeve, në propozimet e reja në bisedimet mes BE-së dhe Turqisë në Bruksel gjen vend shpejtimi i heqjes së vizave për shtetasit turq, si dhe dyfishimi i shumës së ndihmës në euro.
Raportet e fundit thonë se BE-ja është e gatshme që heqja e vizave për turqit të mos bëhet në tetor, por në qershor të këtij viti, që do të thotë se ata mund të udhëtojnë pa viza që në muajin e parë të kësaj vere.
Po ashtu parashikohet dyfishimi i shumës të ofruar Turqisë nga BE-ja për t’i pranuar dhe për t’u ardhur në ndihmë refugjatëve sirianë. BE-ja do të japë tre milionë euro të tjera deri në fund të 2018-ës që Turqia t’i strehojë sirianët.
Propozimet parashikojnë dhe marrjen prej Turqisë të të gjithë emigrantëve të parregullt nga ishujt grekë. Ndërsa BE-ja do të marrë më pas nga Turqia një refugjat sirian për çdo sirian të rimarrë prej Turqisë nga ishujt grekë.
Turqia ka kërkuar më herët që të mos ketë më shtyrje të dhënies së ndihmës financiare, ndërsa ajo nuk e ka marrë ende shumën e premtuar, si dhe një garanci për anëtarësi të plotë në BE.
Propozimet janë në shqyrtim, dhe ende nuk ka deklarata të palëve. /tesheshi.com/
