Turqia i ka ofruar një propozim SHBA-ve që pjestarët e Njësisë për Mbrojtjen e Popullit (YPG) të tërhiqen në lindje të Eufratit në Siri dhe që forcat turke dhe amerikane të vendosen në rajonin sirian të Menbixhit.
Zyrtari i cili dëshiroi të mbetet anonim pasi informacioni ende nuk është publik, tha se SHBA-ja po shqyrton propozimin e paraqitur para sekretarit Rex Tillersoni gjatë vizitës dyditore në Ankara.
Tillerson arriti në Turqi të enjten në një vizitë dyditore për biseda, të cilat zyrtarët presin të jenë të pakëndshme, ngase marrëdhëniet ndërmjet vendeve aleate u dëmtuan për shkak të një numri të madh çështjesh, veçanërisht për shkak të ndihmës amerikane milicisë kurde të YPG-së në Siri, të cilën Turqia e konsideron terroriste.
Tillerson dhe presidenti Erdogan të enjten kanë pasur bisedime “produktive dhe të hapura” për përmirësimin e lidhjeve mes dy vendeve, tha zyrtari i Departamentit të Shtetit i cili udhëton me Tillersonin.
Nga ana tjetër, burimi i presidencës turke pohon se Erdogan i ka transmetuar Tillersonit se cilat janë prioritetet dhe pritjet në lidhje me Sirinë dhe çështjet e tjera rajonale, transmeton Reuters.
Presidenti i Turqisë dhe Tillerson kanë biseduar edhe për Irakun, zhvillimin rajonal dhe luftën kundër terrorizmit, njoftoi burimi. /tesheshi.com/
