Aleksandër Vulin, një emër kontravers në qeverisjen serbe, nuk do jetë më në kabinetin e ri serb. Ai mbajti postin e ministrit të Brendshëm, por tani Vuçiç i ka besuar spiunazhin serb, BIA-n.
Kujtojmë se Vulin njihet për deklaratat e tij se mbron dhe beson në krijimin e një “bote serbe”. Sipas tij, “e vetmja mënyrë që Ballkani të mbetet stabil është që serbët të jetojnë në një shtet”.
Ai vazhdimisht ka thënë se beson në nevojën e bashkimit të të gjithë serbëve si një komb i vetëm politik, duke shtuar se “uniteti krijohet në Serbi, në Beograd”.
“Serbia është ajo që i mbledh të gjithë serbët dhe që mendon se si do të kalojnë një vendim te serbët në Kosovë, serbët në RS dhe nëse vëllezërit tanë në Kroaci do të vuajnë apo jo për shkak të diçkaje, si do të shkojnë serbët në Mal të Zi, dhe a do t’u ndodhë ndonjë gjë në Maqedoninë e Veriut”, tha Vulin në fillim të këtij viti në një emission televiziv.
Vetëm një politikë e tillë, thotë ai, garanton mbijetesën e popullit serb.
“Krijimi i një ‘bote serbe’ është detyrë e brezit tim”, përfundoi Vulin me atë rast. /tesheshi.com/
