Pikërisht pas takimit Rama-Basha, kundërshtimit të opozitës për të votuar reformën në drejtësi, kur të gjitha prozhektorët mediatikë ishin drejtuar tek mbledhja e grupit parlamentar të Partisë Demokratike, u shpërnda në të 100-at e sekondës një njoftim i Prokurorisë së Përgjithshme.
Në këtë njoftim theksohet se ishte mbledhur gjykata e Tiranës (nuk thuhet se kur) dhe kishte vendosur të pezullojë kreun e Policisë së Shtetit Hako Çako dhe të arrestojë dy zyrtarë të lartë të uniformave blu, në kuadër të hetimit për pajisjen përgjuese që u denoncua nga PD dhe Presidentin Nishani.
Siç bëhet e ditur nga Prokuroria e Përgjithshme, nën hetim për të ashtuquajturën aferë e përgjimit është edhe Ministri i Brendshëm, Saimir Tahiri.
Sipas të gjitha gjasave, këto ditë do të bëhet publike se Tahiri është nën hetim dhe ngaqë ai nuk është më deputet, edhe nëse do të dojë prokuroria ta arrestojë, këtë do ta bëjë pa pasur nevojë të kërkojë autorizim nga Kuvendi.
Ndërkaq, Edi Rama është përpara një shantazhi të fortë: të largojë Saimir Tahirin, njeriun më të rëndësishëm të kabinetit apo ta mbajë siç bëri Sali Berisha me gardistët.
Por pse veproi në këtë moment Prokuroria për të kërkuar veprime drastike të pezullimit dhe arrestimit të krerëve më të lartë të Policisë, kur këtë nuk e ka bërë në raste flagrante siç ishin 21 janari apo Gërdeci, kur u kërkua thjesht hetim, por që nuk u lejuan nga krerët e lartë të Policisë?!
Në fakt, hetimin e ka kërkuar zyrtarisht kreu i shtetit shqiptar, i cili është zyrtarisht edhe kryetar i KLD-së dhe njeriu që komandon prokurorin. Por, tjetër gjë është hetimi dhe tjetër gjë një operacion i tillë, i cili duket se është bërë ose i sforcuar ose i justifikuar nga një qëllim i caktuar.
Interesant është fakti se LSI si aleate e qeverisë ka mbajtur një qëndrim krejt dorëjashtë madje përkrahës të Llallës.
Ministri Ylli Manjani, në një deklaratë publike theksoi se “Në përgjigje të interesit të medias lidhur me qëndrimin e Ministrit të Drejtësisë, z. Ylli Manjani mbi vendimet e Gjykatës së Tiranës, përfshirë edhe atë për pezullimin nga detyra të Drejtorit të Përgjithshëm të Policisë, z. Haki Çako, Ministri Manjani bën me dije se këto janë çështje të zbatimit të ligjit dhe nuk mund të komentohen nga ana e tij, sikurse edhe ligjërimi politik nuk do të ndihmonte aspak për ecurinë e çështjes”.
Para dy javësh Ilir Meta i kërkoi Edi Ramës kokën e Saimir Tahirit dhe kryeministri nuk pranoi.
Por me këtë hetim të Prokurorisë situate bëhet komplekse. Adriatik Llalla është future qoftë edhe padashje, duke u bërë pjesë e luftës politike./tesheshi.com/
