Prokuroria ka nisur një letër porosi zyrtare në disa institucione homologe të Europës, për disa kandidatë për zgjedhjet e 21 qershorit, për të cilët është hedhur akuza mbi veprimtari kriminale jashtë vendit. Siç mësohet Ministria e Brendshme dhe ajo e Drejtësisë janë vendosur në një linjë me organin e akuzës për të përgatitur procedurat adekuate për emrat e kërkuara nga Prokuroria.
Me anë të shkresave zyrtare, i është kërkuar Interpolit por edhe policive të vendeve të BE nëse kanë të regjistruar skeda kriminale për kandidatët e akuzuar. Një burim i prokurorisë së Përgjithshme bëri të ditur se emrat janë pjesë e sekretit hetimor, dhe pyetjes nëse janë vetëm emrat e denoncuara nga partitë dhe mediat u përgjigj: Ka edhe të tjerë.
Në një deklaratë të shkurtër për mediat, Prokurori i Përgjithshëm Adriatik Llalla ka bërë të ditur se organi i akuzës ka nisur verifikimin për të gjithë kandidatët.
Për të gjitha rastet që ka kallëzime do të kryhet proces verifikimi dhe më pas do të hetohen. Për të gjitha rastet e bëra publike, përfshirë ato në media, ku për individë të ndryshëm ka dyshime, prokuroria do të nisë menjëherë hetimet”, tha Llalla.
Ndërkohë, edhe ndërkombëtarët e akredituar në Tiranë, në kuadër të procesit të dekriminalizimit, janë duke kaluar në skaner çdo emër kandidati të zyrtarizuar deri më tani. Më shumë se një javë më parë “tesheshi.com”, transmetoi i pari lajmin se institucione ndërkombëtare të rëndësishme dhe ambasada të vendeve aleate po shqyrtojnë të gjithë kandidatët.
Një burim pranë selisë së OSBE-së bëri të ditur se ka shumë gjasa që disa nga emrat e shpallur nga partitë si kandidatë në disa bashki të tërhiqen në momentin e fundit: “Ende ka afat për regjistrimin e kandidatëve, ka hapësira për shumë lëvizje:, tha ai.
/tesheshi.com/
