Prokuroria e Tiranës ka zbardhur arsyen lëshimit të urdhër arrestimit dhe akuzës së ngritur ndaj ish-Ministrit Ksera, prangosur një natë më parë në Gjirokastër.
Kështu sipas organit të akuzës, për Spiro Kseran u lëshua urdhër arresti ditën e premte, pasi dyshohet se ka kryer veprën penale të “vjedhjes duke shpërdoruar detyrën” nëpërmjet procedurave fiktive për organizimin e disa aktiviteteve social-kulturore gjatë vitit 2013.
Prokuroria e Tiranës, Njësia Task-Force, ka zhvilluar hetimet në bazë të kallëzimit të Kontrollit të Lartë të Shtetit. Në kuadër të veprimeve proceduriale, janë krijuar dyshime të arsyeshme se ish-ministri Ksera, në cilësinë e kryetarit të Entit Prokurues, në bashkëpunim me ish-drejtorin e Kabinetit, Kleves Bitro, si edhe me mbështetjen e disa zyrtarëve të tjerë, kanë vjedhur 30 milionë lekë të reja nga buxheti i shtetit.
Këto shuma financiare, ish-drejtuesit e lartë të Ministrisë së Punës i kanë akorduar për disa aktivitete për shtresa të ndryshme sociale, por që faktikisht këto evente nuk janë realizuar, ose janë realizuar me kosto shumë më të ulta nga ato që janë shënuar në dokumenta.
Në bazë të veprimeve proceduriale, rezulton se janë kryer pagesa për aktivitetet që nuk janë kryer, Prioriteti i minoriteteve-Barazi në të drejta”; “Kapërceni paragjykimet-Njihni romët”; “Ne sfidojmë të gjithë së bashku”; “Të ndryshëm, por të barabartë”; “Përfshirje sociale-Drejtësi sociale” , “Mosha e tretë, vlerë për shoqërinë”.
/tesheshi.com/
