Rasti i Shefqet Krasniqit vazhdon të mbetet në qendër të vëmendjes të opinionit, por si duket po aq edhe të prokurorisë. Se ky rast po trajtohet si i veçantë tregon fakti se Prokuroria Speciale në komunikatën e dërguar sot nuk e ka përmendur Shefqet Krasniqin që është ndër të akuzuarit por ka thënë se kanë pushuar hetimet ndaj të tjerëve të përfshirë në këtë rast.
“Ndaj të pandehurve të tjerë të përfshirë në këtë çështje penale, në mungesë të provave është marrë aktvendim për pushimin e hetimeve”, thuhet në njoftimin e Prokurorisë Speciale. E në këtë rast ishte i përfshirë edhe Shefqet Krasniqi. Por raportimet e fundit e demantojnë këtë, pasi që prokuroria nuk po heq dorë nga ky rast dhe tashmë e ka demantuar vetveten.
Nisur nga kjo komunikatë zyrtare, të gjitha mediat kanë raportuar se ndaj hoxhës Krasniqi kanë pushuar hetimet, por përkundër kësaj prokuroria po shfrytëzon mundësitë e fundit ligjore për të mbajtur rastin e Shefqet Krasniqit të hapur.
Përkundër raportimeve në media se Prokuroria Speciale e Kosovës ka nxjerrë aktvendim për pushim të hetimeve për ish-imamin e Xhamisë së Madhe në Prishtinë, Shefqet Krasniqi, kallxo.com mëson se hetimet ndaj Krasniqit nuk janë pushuar, por është kërkuar vazhdimi i tyre.
Kallxo.com ka kontaktuar me prokurorin special Haki Gecaj i cili ka ngritur aktakuzë ndaj disa imamëve por ai ka mohuar që Krasniqi të jetë pjesë e hetimeve që ai ka bërë.
“Shefqet Krasniqi nuk është pjesë e hetimeve në rastin tim”, tha shkurt Gecaj.
Kallxo.com ka kontaktuar edhe me avokatin e Krasniqit, Sevdali Zejnullahu, i cili ka thënë se është i njoftuar se prokurori Elez Blakaj ka kërkuar vazhdimin e hetimeve edhe për 6 muaj.
“Kjo është një kërkesë e pakuptimtë e prokurorisë ndaj të cilës kemi bërë ankesë në Gjykatën e Apelit. Prokuroria ka pasur kohën e mjaftueshme për të zbuluar të vërtetën për këtë rast. Ne jemi të bindur se Gjykata e Apelit do të miratojë kërkesën tonë duke pushuar hetimet”, tha Zejnullahu.
Ndryshe, para përfundimit të afatit dyvjeçar të hetimeve, prokurori përpos pushimit të hetimeve apo ngritjes së aktakuzës, e ka edhe një opsion të tretë, atë të kërkimit edhe të 6 muajve shtesë për hetime. Këtë opsion po e shfrytëzon prokuroria duke e mbajtur të hapur këtë rast. /tesheshi.com/
