Tomë Gashi, avokat i ish-deputeti Azem Syla, ka thënë se prokurori i EULEX-it ka kërkuar që t’i vazhdohet masa e paraburgimit Sylës dhe shtatë të dyshuarve të tjerë edhe për katër muaj.
Sipas kërkesës së prokurorisë, ende ekzistojnë arsyet për vazhdimin e paraburgimit, sepse sipas tij ende ekziston rreziku i ikjes, rreziku i pengimit të procedurës penale dhe rreziku i përsëritjes së veprës penale.
Tomë Gashi, në një shkrim në Facebook ka thënë se mbrojtja e Sylës do ta kundërshtojë kërkesën, ngase vazhdimi i paraburgimit ndaj Azem Sylës mund të konsiderohet vetëm si dënim i tij dhe në asnjë mënyrë si masë ligjore për zhvillimin e papenguar të hetimeve në këtë çështje penale.
Ndryshe, Azem Syla është në paraburgim që nga data 30 prill, ai së bashku me 51 persona të tjerë dyshohen për veprat penale që kanë të bëjnë krim të organizuar, marrje ryshfeti, tjetërsim pronash, etj. /tesheshi.com/
