Milivoje Katniç, prokurori special malazez, ka deklaruar të dielën në lidhje me një përpjekje për grusht shteti gjatë zgjedhjeve të tetorit të vitit të shkuar se në të ishin përfshirë organes shtetërore ruse, me synimin për ta penguar Malin e Zi që t’i bashkohet NATO-s.
Autoritetet e vendit të vogël ballkanik kishin folur më herët për orkestrim të komplotit nga nacionalistët rusë, ndërkohë që prokurori special ka shkuar më tej, duke pretenduar dhe përfshirjen e autoriteteve ruse.
“Deri tani kemi patur prova se strukturat nacionaliste ruse qëndronin pas [komplotit], por tani kemi prova gjithashtu se në një nivel të caktuar qenë të përfshira dhe organe shtetërore ruse,” raporton The Guardian t’u ketë thënë Katnic mediave lokale.
Prokurori malazez ka shtuar se për hetimin po ndihmonin shërbimet sekrete të vendeve mike në Europë, përfshirë Britaninë e Madhe dhe SHBA-në.
Policia malazeze arrestoi një grup nacionalistësh serbë në prag të votimeve të 16 tetorit të 2016-s, ndërkohë që dy të dyshuar rusë janë në kërkim për një komplot për të marrë parlamentin dhe për të vrarë ish-presidentin e ish-kryeministrin Milo Gjukanoviç. /tesheshi.com/
