Prokurorët izraelitë kanë lëshuar një aktakuzë të ndryshuar kundër kryeministrit Benjamin Netanyahu, duke specifikuar akuzat në një rast korrupsioni në të cilin ai akuzohet se i kërkoi një mediaje që të raportonte në mënyrë të favorshme për të në këmbim të shërbimeve të tij.
Netanyahu është akuzuar për mashtrim, prishje të besimit dhe ryshfet në tre raste.
Një nga akuzat është ajo që Netanyahu promovoi rregullore që i sollën qindra miliona dollarë kompanisë së telekomunikacionit Bezeq në këmbim të raportimit të favorshëm në faqen e lajmeve të njohura Ëalla të së njëjtës kompani.
Presion i vazhdueshëm mbi media
Në përgjigje të një kërkese nga avokatët e Netanyahu-t për më shumë detaje, prokurorët izraelitë lëshuan një letër, duke thënë se kishte 315 raste kur faqes iu kërkua të shkruante më pozitivisht për Netanyahu-n dhe familjen e tij, dhe se Netanyahu vetë ishte i përfshirë në 150 raste të tilla.
U kërkua, ndër të tjera, që të jepet më shumë hapësirë ose të nxirren në pah artikuj pozitivë rreth Netanyahu-t dhe familjes së tij, që titujt të ndryshohen dhe t’u kushtohet më pak vëmendje, ose që edhe historitë që nuk shkojnë në favor të tyre të hiqen.
Gjyqi i Netanyahu-t filloi vitin e kaluar dhe pritet të rinisë në shkurt.
Kryeministri mohon të gjitha akuzat, duke pretenduar se ai është viktimë e një “gjuetie shtrigash” të mbështetur nga media armiqësore, policia dhe prokurorët. /tesheshi.com/
