Ku do të shkojnë të gjithë prokurorët dhe gjyqtarët që pritet të eleminohen nga vettingu ndërkombëtar?!
Në media po flitet për dorëheqje masive të një grupi të madh njerëzish të sistemit të drejtësisë, përpara se të nisë vettingu.
Ndërkaq, burime diplomatike i bënë të ditur tesheshi.com se prokurorët e lartë dhe gjyqtarët më influentë pritet të tentojnë hyrjen në politikë duke kandiduar për deputetë në zgjedhjet e vitit 2017.
Dhe ky aspekt pritet të mos pengohet nga ndërkombëtarët, megjithëse po konsiderohet një problem gjithnjë e më i madh sesa i ashtëquajturi “kriminalizimi” i politikës.
Vetë kryeprokurori Adriatik Lalla, i propozuar nga PD-ja për postin që mban, po shfaq qëndrime shumë të afërta më opozitën, por edhe me kreun e Kuvendit Ilir Meta, me të cilin ka marrëdhënie të shkëlqyera.
Loja më e fundit politike me shoqërimin e gazetarit investigativ, Artan Hoxha tregoi një linjë veprimi të Prokurorisë, PD-së dhe LSI-së, ku qëllimi ishte akuza apo zbulimi i akuzës, sipas të cilës ministri i brendshëm Saimir Tahiri kishte dekonspiruar hetimet ndaj italianit Guidi, mbetur në Ishëm.
Tashmë nuk ka gjë të fshehur, prokuroria dhe një pjesë të gjyqtarëve i janë kundërvënë hapur reformës në drejtësi dhe faktikisht mazhorancës në pushtet.
Këtë e kanë bërë shoqata e prokurorëve dhe ajo e gjyqtarëve që janë grupime të fuqishme interesi në vend.
Burime diplomatike bëjnë me dije se ekziston shqetësimi që milionat e fituara nga korrupsioni, gjyqtarët dhe prokurorët do t’i investojnë në politikë duke rritur kështu rrezikun e një galvanizimi të madh të situatës.
Futja në politikë e njerëzve nga gjyqësori mund të sjellë përdorimi e dosjeve, por nga ana tjetër mund të bëjë atë që ka ndodhur gjithë këto vite, kur prokurorët dhe gjyqtarët e kthyer në deputetë kanë qenë konformistët e mëdhenj me politikën.
Nuk është një çudi e madhe që njerëzit e drejtësisë kanë hyrë në politike. Në Shqipëri ka ndodhur prej kohësh, por kurrë një njeri i drejtësisë i kthyer në politikan nuk është bërë fenomen i vënies së drejtësisë nga lart.
Rastet e para të këtij importimi janë: Fehmi Abdiu, një gjykatës i kohës së komunizmit që u implementua në politikë si deputet i PS-së dhe Rustem Gjata, gjykatës i kohës së komunizmit që u fut në politikë si deputet i PD-së.
Me kalimin e viteve, këto u ndoqën nga të tjerë.
Ish-kryeprokurori, Theodhori Sollaku u zgjodh në Asamblenë e Partisë Socialiste para zgjedhjeve parlamentare të vitit 2013.
Ilirian Celibashi, ish-kryetar i gjykatës në Fier u zgjodh zv.ministër, e më pas kryetar i KQZ-së, e në fund ministër i qeverisë “Rama”, duke dhënë dorëheqjen në një situatë të mistershme, pas vdekjes së deputetit democrat, Sokol Olldashi.
Shembull tjetër është ish-prokurori i Tiranës, Vexhi Muçmata që u zgjodh deputet i Kukësit, por që prej ditës që u zgjidh nuk ka folur kurrë.
Ulsi Manja deputeti aktual i Dibrës ka qenë prokuror në Shkodër .
Nga kahja tjetër është Arben Ristani, sot Sekretar i Përgjithshëm i PD-së.
Ka shumë shembuj, nuk është hera e parë që ndodh, por varet si ndodh dhe çdo të sjellë me vete, ndoshta dhe milionat e fituar në vite…?!
Kjo është pikëpyetja që mundon ndërkombëtarët. /tesheshi.com/
