Prokurorët amerikanë besojnë se mbështetësit e Presidentit Donald Trump planifikuan të “kapnin dhe vrisnin zyrtarë të zgjedhur” gjatë pushtimit të Kongresit javën e kaluar, sipas dokumenteve të reja të gjykatës.
Një dokument i paraqitur nga avokatët e Departamentit të Drejtësisë kërkon arrestimin e Jacob Chansley të Arizonës, një teoricien konspiracioni për QAnon, i cili u filmua duke qëndruar me brirë në kokë në tryezën e Zv.Presidentit Mike Pence në ambientet e Senatit Amerikan.
“Provat e forta, duke përfshirë fjalët dhe veprimet e vetë Chansley në Kapitol, flasin për qëllimin e protestuesve për të kapur dhe vrarë zyrtarë të zgjedhur të qeverisë amerikane”, thanë prokurorët.
Dokumenti i arrestimit, i shkruar nga avokatët e Departamentit të Drejtësisë në Arizona, detajon shumë nga hetimet e FBI-së ndaj Chansley, duke zbuluar se ai la një mesazh për Pance duke e paralajmëruar se “është vetëm çështje kohe, drejtësia vjen”.
Një mbrojtës publik që përfaqësonte Chansley nuk ishte në dispozicion për koment. Chansley pritet të paraqitet në gjykatën federale të premten.
Prokurorët dhe agjentët federalë kanë filluar të ngrejnë akuza serioze për dhunë në Kongres, duke përfshirë një çështje kundër zjarrfikësit në pension Robert Sanford, si dhe kundër Peter Stager, i akuzuar për rrahjen e një polici tjetër me një flamur të SHBA.
Më shumë se 80 kallëzime penale
Në çështjen e Chansley, prokurorët thonë se akuzat “përfshijnë pjesëmarrje aktive në trazira në të cilat qeveria e SHBA u përpoq me dhunë të përmbysej” dhe paralajmëruan se trazirat ishin ende “duke vazhduar” ndërsa forcat e sigurisë përgatiteshin për protesta të reja në Uashington.
Ata gjithashtu deklaruan se ai po përdorte drogë dhe se vuante nga një sëmundje mendore dhe i thanë gjykatësit se ekzistonte një rrezik serioz që ai të shpëtonte.
“Chansley ka thënë hapur se ai beson se ai është një i huaj, një qenie më e lartë dhe se ai është këtu në Tokë për të sjellë një realitet tjetër”.
Ministria e Drejtësisë ka ngritur më shumë se 80 kallëzime penale në lidhje me trazirat.
FBI gjeti shumë nga të pandehurit falë fotove dhe videove në rrjetet sociale. /tesheshi.com/
