Duke folur me detajisht për krizën energjitike, ministrja e linjës Belinda Balluku shpalosi planin e qeverisë për mbështetje finaanciare ndaj atyre që do instalojnë panele diellore në taraca.
Ajo foli me shifra kur tha se “ka ardhur momenti që të gjithë të kontribuojmë për të kursyer. Nëse kursejmë 1%, do të ishte ekuivalente e 28 milionë eurove. Ne duhet të fillojmë të reagojmë e të marrim masa”, tha ajo, duke qenë më konkrete me masën më të afërt.
“Ne kemi vendosur që të nisim një projekt me 2000 abonentë, që konsiston në mbështetje. Projekti konsiston në mbështetjen financiare për vendosjen e paneleve diellore në tarracat e pallatave dhe ngrohjen e ujit që konsiston në ulje të konsumit energjetik me 20-30%. Kjo nis që nga 1 tetori. Më 1 nëntor, Agjencia e Eficencës së Energjisë do të hapë një platformë ku të gjithë qytetarët do të aplikojnë për të ndërtuar impiantet”, tha Balluku.
Nga ana tjetër, duke potencuar faktin se Shqipëria nuk do ketë masat ekstreme edhe në çmim të vendeve të tjera, edhe më të zhvilluara padyshim, kryeministri Rama i mëshoi rëndësisë së një morali kolektiv të nevojshëm në këtë krizë.
“Të gjithë ekspertët ndërkombëtarë e konsiderojnë jo të arsyeshme për të mos e prekur çmimin e energjisë për
konsumatorët familjarë dhe biznesin e vogël. Masa shkon tek ata që konsumojnë më shumë, kanë më shumë dhe përbëjnë vetëm 4% të të gjithë konsumatorëve. Ne besojmë që kjo masë është drejtë, pasi nuk kanë pse të paguajnë të tjerët për ata që kanë pishina e ndriçim. Ne do të vazhdojmë edhe me planin e kursimit por pa hyrë në masa drastike që po i marrin vende shumë më të zhvilluara se ne.
Duam që të kemi ndjesinë e një fakti të thjeshtë, në këtë përpjekje të madhe jemi të gjithë bashkë. Të dalim të gjithë nga kjo krizë siç dolëm nga tërmeti e pandemia, jo më të dobët, por më të fortë”, u shpreh Rama.
