Sistemi i drejtësisë në Kosovë është një nga fushat ku qytetarët kanë humbur thellësisht besimin duke e vlerësuar si të korruptuar dhe të kapur nga politika.
Dhe për të kthyer sadopak integritetin e këtij sistemi dhe fuqizuar pavarësinë e gjyqësorit dhe prokurorit të shtetit, me qëllim të krijimit të një sistemi të fortë të drejtësisë dhe përmirësimit të besimit të publikut, Instituti Demokratik i Kosovës në bashkëpunim me Lëvizjen FOL dhe Qendrën për Bashkëpunim Juridik Ndërkombëtar (CILC) me seli në Hagë, ka lansuar projektin “Promovimi i integritetit në sistemin e drejtësisë”, projekt që mbështetet nga Ambasada holandeze në Prishtinë.
Gjatë ceremonisë, ambasadorja holandeze në Kosovë, Gerrie Willems, ka thënë se me zbatimin e këtij projekti do të arrijmë të kuptojmë situatën aktuale sa i përket integritetit në sistemin gjyqësor dhe prokurorial, do të thellohen njohuritë për integritetin dhe do të ngritën kapacitetet për t’u marrë me çështjet e integritetit në sistemin gjyqësor dhe prokurorial.
“Ky projekt do të hap debat të një këndvështrimi tjetër për integritetin në sistemin e drejtësisë kosovare. Në këtë mënyrë, synohet të rritet besimi i qytetarëve në prokurori dhe gjykata dhe do të përmirësohet në përgjithësi sundimi i ligjit në Kosovë”, ka shtuar ambasadorja.
Zv. drejtori i Qendrës për Bashkëpunim Juridik Ndërkombëtar, Eric Vincken ka thënë se integriteti është koncept me të cilin qytetarët ndeshen çdo ditë dhe se nuk është një term i veçantë që përdoret vetëm për gjyqësorin.
“Integriteti gjithashtu ka nevojë për mirëmbajtje, monitorim të përhershëm dhe mekanizma për t’u marrë me shkeljet e integritetit, jo vetëm në Kosovë apo në Holandë, por në çdo vend të botës”, tha ai.
Ndërsa kryesuesi i Këshillit Gjyqësor të Kosovës, Nehat Idrizi, ka theksuar se ky projekt shërben si një kornizë e mjaftueshme konceptuale për kryerjen e hulumtimeve, analizave, rekomandimeve dhe ngritjen e kapaciteteve lidhur me integritetin e akterëve në sistemin gjyqësor të Kosovës.
“Vazhdimisht kemi shprehur qasjen tonë miqësore ndaj iniciativave që kanë për qëllim promovimin e integritetit dhe rritjen e besimit të publikut në punën e sistemit gjyqësor”, ka shtuar ai.
Kurse kryesuesi i Këshillit Prokurorial të Kosovës, Blerim Isufaj, ka potencuar ndihma e këtij projekti në realizimin e hulumtimeve kualitative dhe kuantitative do t’i ndihmojë jashtëzakonisht shumë në identifikimin e progresit dhe sfidave të sistemit prokurorial e që do të jetë mbështetje për këshillin për marrjen e vendimeve adekuate. /tesheshi.com/
