Në qendër të Tiranës u realizua në fundjavë prishja e Hotel Minirit, mes Pallatit të Kulturës dhe Hotel Tiranës, etiketuar nga kryebashkiaku Veliaj si “çibani i fundit” i qendrës së kryeqytetit.
“Çibani i fundit! Kur Edi Rama nisi pastrimin e Tiranës, qendra e kryeqytetit, Lana dhe Parku Rinia kishin 1,000 + ndërtime pa leje! Pas 15 viteve pastrim (pa mandatin e gjumit) sot largohet dhe karakatina e fundit nga Sheshi Skënderbej për t’i hapur rrugë stacionit të autobusit”, shkruan kryebashkiaku Veliaj në rrjetet sociale.
Në fakt, ky hotel ishte planfikuar të prishej në kuadër të ndërtimit të Xhamisë së Madhe në anën e pasme të këtij hoteli, ku përfshihej ish-Disko Klub Albania dhe një pjesë e lulishtes pas Pallatit të Kulturës.
Aty ku ndodhet hoteli do ishte e ashtuquajtura Lulishtja e Kur’anit, e cila sipas projektit të studios fituese BIG nga Danimarka, do lidhte oborrin e xhamisë, aty ku do ishte dhe një muze i bashkëjetesës fetare, me Sheshin Skënderbej.
Kjo mund të dallohet qartë dhe nga fotoja e projektit, ku dallohet një lulishte aty ku lartohej hoteli tashmë i rrafshuar.
Lulishtja e Kur’anin do ishte unikale në llojin e saj në botë, pasi në çdo pemë e gjethnaje do ishin të vendosura versete kuranore. Siç dihet tashmë, ky projekt ra viktimë e luftës politike mes palëve. /tesheshi.com/
