Senatori republikan amerikan Ron Johnson argumenton se Serbia dhe Kosova kanë bërë thirrje që SHBA të përfshihen më shumë në zgjidhjen e çështjes së Kosovës, duke deklaruar se i dërguari special i Shtëpisë së Bardhë Richard Grenell dhe përfaqësuesi special për Ballkanin Perëndimor, Matthew Palmer kanë një plan të përbashkët për Kosovën, i cili është përqëndruar kryesisht te ekonomia.
Johnson, i cili gjithashtu kryeson Nënkomitetin për Evropën dhe Bashkëpunimin Rajonal të Sigurisë, e i cili debatoi për Ballkanin Perëndimor të mërkurën, i tha Zërit rë Amerikës se nuk ka një afat real për zgjidhjen e çështjes së Kosovës këtë vit, duke përmendur se formimi i qeverisë së Kosovës është në pritje ashtu si dhe zgjedhjet në Serbi.
Ai theksoi se nuk do të përcaktojë afate artificiale dhe se është më mirë të shkohet “hap pas hapi”.
“Kosova duhet të krijojë një qeveri dhe unë nuk dua të përcaktoj afate artificiale”, tha ai.
I pyetur nëse do të thotë që Serbia dhe Kosova “po kërkonin Grenell”, ai tha se ata po kërkonin më shumë angazhim amerikan.
“Dhe kjo duhet të jetë një shenjë pozitive që kemi një përfaqësues special të Departamentit të Shtetit – Palmer – dhe një të dërguar special të Shtëpisë së Bardhë – Grenell. Ne dëgjuam në këtë diskutim që të dy po bashkërendojnë”, tha Johnson.
Ai thotë se ka biseduar me të dy dhe ata kanë një plan, fokusi kryesor i të cilit është në shanset ekonomike.
“Unë mendoj se ata mund të arrijnë diçka këtu dhe pastaj të përpiqen t’i sjellin të dy palët në tryezë, të punojnë së bashku dhe t’i mbështesin”.
Ai shtoi se do të ishte “mirë” për autoritetet e Kosovës që të heqin taksën 100 përqind për importin e mallrave nga Serbia dhe Bosnja, dhe që Serbia të ndalonte së punuari për tërheqjen e njohjes së Kosovës.
“Ky do të ishte një hap i rëndësishëm. Unë mendoj se Palmer dhe Grenell po kërkojnë ndonjë investim që do të inkurajonte të dy vendet të bashkëpunojnë. Ne po bëjmë gjithçka që mundemi për të promovuar mundësi më të mira ekonomike dhe tërheqjen e investimeve dhe për të dërguar një sinjal për qytetarët e të dy vendeve se marrëveshja e ideuar do ketë rezultate”, tha Johnson. /tesheshi.com/
