Shtetet e Bashkuara njoftuan sanksione të reja ndaj Iranit në lidhje me programin e tij të raketave balistike dhe ajo që thuhet se është mbështetje e Iranit për organizatat terroriste.
Departamenti amerikan i Shtetit tha se 18 organizata dhe individë do të preken nga masat e reja. Sipas tij, të gjithë 18 subjektet mbështesin programin e raketave balistike të Iranit apo trupat elitë të Rojeve Republikane.
Deklarata gjithashtu, kritikoi mbështetjen e Iranit për qeverinë e Sirisë dhe grupe të tilla si Hezbollahët apo Hamasin.
“Shtetet e Bashkuara mbeten thellësisht të shqetësuara për aktivitetet keqbërëse të Iranit në gjithë Lindjen e Mesme që minon stabilitetin rajonal, sigurinë dhe prosperitetin”, thuhet në deklaratë.
“Irani vijon të mbështesë grupe terroriste si Hezbollahët , Hamasin dhe palestinezët xhihadistë që kërcënojnë Izraelin dhe stabilitetin në Lindjen e Mesme. Irani ka ruajtur edhe mbështetjen e fortë për regjimin e Asadit, pavarësisht masakrave të këtij të fundit ndaj popullit të tij”.
Deklarata akuzon gjithashtu Iranin se ka sjellë zgjatjen e konfliktit në Jemen duke furnizuar kryengritësit Huthi.
Irani u zotua të hakmerret ndaj sanksioneve të reja. Në një deklaratë, ministria e Jashtme e këtij vendit thotë se Irani do të vendosë sanksione reciproke ndaj individëve amerikanë dhe organizmave që kanë vepruar kundër popullit Iranian dhe kombeve të tjera muslimane në rajon. /tesheshi.com/
