Partia Demokratike nuk depozitoi asnjë pyetje për programin e qeverisë, përgjigjet e së cilave ishin parashikuar të merreshin në seancën plenare të orës 18:00.
Përmes një deklarate, grupi parlamentar i PD-së e argumenton këtë qëndrim me faktin se drejtimi i pyetjeve pa mundësi për debat është keqpërdorur për të marrë kohën e një propagande elektorale ndër vite.
“Vazhdimi i seancës në orën 18.00 sipas proçedurës së rregullores së Parlamentit lejon vetëm depozitimin e pyetjeve me shkrim pa të drejtën e replikës apo debatit.
Eksperienca dhe historiku i këtyre seancave ka treguar që, drejtimi i pyetjeve pa mundësi për debat është keqpërdorur për të marrë kohën e një propagande elektorale.
Koha e përgjigjeve asnjëherë nuk i ka shërbyer qartësimit programor për qytetarët, por ka favorizuar reklamën e propagandën e kryeministrit” thuhet në deklaratën për mediat.
Në vijim, PD deklaron se do të bëjë opozitë të vërtetë dhe përmbajtësore.
“Partia Demokratike nuk do t’i japë asnjë shans kësaj maxhorance të keqpërdorë kohën në favor të publiciteteve varfëruese për shqiptarët.Për rrjedhojë vendimi i Grupit Parlamentar i Partisë Demokratike, është të mos drejtojë pyetje që i japin mundësi propagandës qeveritare” theksohet në deklaratë.
PD shprehet se pyetjet dhe çështjet që shqetësojnë qytetarët do të ngrihen gjatë seancës së debatit ku secili deputet do të ketë mundësinë të mbrojë gjatë fjalës së tij qëndrimet dhe argumentet në favor të qytetarëve. /tesheshi.com/
