Kryeministri Edi Rama prezantoi programin e qeverisë, ndërsa premtoi zgjidhje të shumë nga çështjet që kanë mbetur pezull ndër vite.
Çështja e pronave, punësimi, zhvillimi i sektorit të turizmit, ishin disa nga premtimet e Ramës, gjatë fjalës së tij.
“Gjatë këtyre katër viteve do të vijmë me qëllime të mëdha në programin tonë qeverisës, ndaj jemi të vetëdijshëm për gabimet dhe defektet tona. Nuk ka ka arsye për të vazhduar avazin e vjetër. Ne do të synojmë të jemi sot e katër vite forca e shembullit, e di që nuk është e lehtë ta thuash dhe ta bësh”, tha Rama, duke vënë fokusin edhe njëherë te premtimi i 220 mijë vendeve të punës.
“Një program i madh investimesh do bëhet në këtë mandat në insfrastrukturën rrugore e shkollore, partneriteti me biznesin do hyjë në një fazë të re. Do të luftojmë korrupsionin në administratë, pastrojmë grabitqarët në zyrat e shtetit.
E kemi ne në dorë të rrisim sigurinë në vend, të godasim fort çdo të fortë që kërcënon njerëzit e zakonshëm në vend.
Do rrisim nivelin e investimeve, duke ulur borxhin, të kapërcejmë nivelin 5% të rritjes ekonomike, të rrisim rroga e pensione në këtë 4-vjeçar.
Do angazhohemi me pushtetin vendor për të mbyllur kapitullin të titujve të pronësisë. Do mbyllim procesin e legalizimeve, duke bërë inventarin e pronave të shtetit, që nga rrugët deri tek të gjitha tokat e lira bujqësore apo turistike, që s’mund t’i lihen më në dorë grabitqarëve.
Turizmin do ta kthejmë në një nga burimet më të mëdha ekonomike në këtë 4-vjeçar. Mos prenotoni ikje jashtë, sezoni turistik do sjellë një erë të re në Shqipëri. Mos u harxhoni kot për të ikur jashtë vitin tjetër”, tha Rama./tesheshi.com/
