Edi Rama dhe Ilir Meta po vazhdojnë në heshtje aleancën e tyre pavarësisht divergjencave të forta politike dhe negociatave për ndarje pushteti që bëhen jashtë syve të publikut. Po një aleancë e konfirmuar mes tyre do të nxjerrë jashtë loje Idrizin duke minimizuar faktorin “çam” brenda koalicionit qeverisës. Burime nga PDIU thanë për tesheshi.com se kjo parti po rishikon strategjinë e saj në prag të zgjedhjeve. Pritet që të dalë me disa propozime konkrete për kryeministrin, për zgjidhjen e konfliktit me opozitën dhe po shikohet mundësia për t’iu bashkangjitur koalicionit opozitar nëse konfirmohet aleanca e PS-së me LSI-në.
PDIU i duhet mazhorancës aktuale për të krijuar një shumicë të cilësuar në Kuvend në mungesë të opozitës. Me PDIU-në ajo arrin 84 votat për ligjet e Reformës në Drejtësi dhe zgjedhjen e presidentit.
Por, a do të jetë Shpëtim Idrizi një ushtar i bindur i Ramës dhe Metës?! Gjasat janë që jo.
Shenjën e parë të rebelimit ai e dha me votimin e ministrave të rinj të qeverisë kur deklaroi mospjesëmarrjen në votim. Po çfarë po kurdis partia e njohur si partia e çamëve, e cila po ndjek modelin e LSI-së për t’u fuqizuar në elektorat me parimin “një vend pune- një votë”?
Roli i negociatorit
Ish-deputet i PS-së, ish-drejtor i Fatos Nanos, ish-aleat i Sali Berishës, duke i besuar sloganit “çam nuk lind, po bëhesh”, Shpëtim Idrizi, e ka krijuar përvojën politike për të luajtur në situata të trazuara. Burimet nga kryesia e kësaj partie bëjnë të ditur se për të faktorizuar rolin e tij ai do të tentojë të bëjë ndërmjetësin mes dy palëve duke propozuar disa zgjidhje efektive në funksion të zgjedhjeve të lira e të ndershme. Propozimet kanë të bëjnë me krijimin e një prokurorie speciale pranë KQZ-së për hetimin e rasteve të manipulimit të votës, ndryshimin në strukturat e policisë në të gjitha rrethet, numërim elekronik të votave, etj..
Futja në çadër
Idrizi u fuqizua pas futjes në qeveri me PS-në, e cila i ndau pjesën e tortës duke i dhënë nën menaxhim shumë drejtori të rëndësishme në qendër e në rrethe. Por kalkulimet e Idrizit për të nxjerrë Metën nga roli i kingmaker-it mund të mos bëhen realitet për aq kohë sa LSI vijon të jetë forca e parë presionuese ndaj PS-së për aleancë. Në këtë situatë PDIU po sheh mundësinë e një rikthimi pranë së djathtës, ku votat e saj mund të kenë më shumë peshë. Vetë Idrizi ka deklaruar ambicien për të marrë 10 deputetë në zgjedhjet e reja. PD-ja e ka hapur derën për ish-aleaten e saj dhe për çdo forcë tjetër që do t’i bashkangjitej çadrës së protestës. Vendimi për aleanca i Idrizit është dukshëm më i lehtë se ai i LSI-së. Duke qenë një parti pa ideologji të fortë politike, por një parti që lufton për kauza, siç është ajo e të drejtave të çamëve apo çështja kombëtare, PDIU e gjen veten lehtësisht në secilin koalicion. /tesheshi.com/
