Reformat e Cipras do të dështojnë. Paralajmërimi vjen nga vetë ish-ministri i Financave, ish-dora e djathtë e kryeministrit grek, “bashkëluftëtari” i betejës greke kundër masave të kursimit në Europë, Janis Varufakis.
I shkarkuar nga Cipras pak para samitit të eurozonës për paketën e shpëtimit të Greqisë, ai nuk ka ndryshuar aspak mendim për reformat, por duket se e ka bërë këtë për kryeministrin Cipras.
“Ai ka pranuar hapur se nuk beson në masat e kursimit që përfshihen në paketë, por kishte shumë pak mundësi përpara vetes e duhej të nënshkruante. Ne u përballëm me një zgjidhje: të ekzekutoheshim ose të kapitullonim. Dhe ai zgjodhi se kapitullimi ishte strategjia më e mirë”, thotë Varufakis.
Ish-numri një i Financave greke, i cili bëri bujë me qëndrimet e tij të prera kundër Europës e Gjermanisë, parashikon se reformat që ka marrë përsipër Cipras do të dështojnë. Në intervistën dhënë BBC-së, ai shton se “Greqia po i nënshtrohet një programi që do të mbetet në histori si katastrofa më e madhe e menaxhimit makroekonomik”.
“Ky program do të dështojë pavarësisht kush merr përsipër ta zbatojë”, vijon ai, duke shtuar se nuk ka më afate kohore kur do të dështojë. “Ka dështuar që pa nisur”, thotë ai preraz, në një prognozë të zymtë të së ardhmes.
Dorëheqja e Varufakis u pa gjerësisht si një shenjë paqeje e Cipras ndaj kreditorëve të Athinës, me të cilët ish-ministri e kishte bërë “zakon” të përplasej. /tesheshi/
