Nga Bujar M. Hoxha
Më 24 mars të vitit 2001, në një takim mes Gjermanisë dhe Shqipërisë, të vlefshëm për eliminatoret e Kupës së Botës, Miroslav Klose futet në lojë në minutën e 72-të. Në të 87-n minutë ai shënon me kokë, dhe Gjermania fiton 2-1.
Do të ishte ndaj Shqipërisë debutimi i lojtarit që do të bëhej golashënuesi më i mirë në historinë e botërorëve. Ai do të ishte goli i parë i Miroslav Klose-s me përfaqësuesen gjermane nga 71 të tillë që do të shënonte në 137 takime ku u aktivizua.
Vetëm tre muaj më parë se të shënonte ndaj Shqipërisë, trajneri i Polonisë kishte udhëtuar drejt Gjermanisë për ta bindur Klose-n të luante për polakët. Një ftesë e refuzuar nga qendërsulmuesi që për më shumë se një dekadë do të ishte sulmuesi numër një i Gjermanisë.
I lindur në Opole të Polonisë në vitin 1978 nga dy prindër sportistë, ai do të ndiqte gjurmët e të atit, që si futbollist pati luajtur dhe me Okserin në Francë.
I zhvendosur shpejt në Gjermani, Klose do ta bënte debutimin e tij në Bundesligë në prill të vitit 2000.
Gjatë karrierës së tij të gjatë futbollistike, ai do të luante për Kaiserslauternin, për Verder Bremenin e Bajernin e Mynihut, për t’i kaluar pesë vitet e fundit të karrierës në Itali, ku u aktivizua me Lacion.
Në 667 takimet e luajtura me klubet ku e kaloi karrierën, Miroslav Klose shënoi 260 gola. Në sezonin 2005-2006, ai u shpall golashënuesi më i mirë i kampionatit gjerman. Po në 2006-tën, Klose shpallet lojtari gjerman i vitit.
Kulmin e karrierës në Gjermani e pati gjatë aktivizimit me Bajernin e Mynihut, duke e fituar dy herë kampionatin e dy herë kupën. Me Lacion do të fitonte Kupën e Italisë në sezonin 2012-2013.
Në nivel ndërkombëtar, Miroslav Klose shënoi 16 gola në finalet e botërorëve ku mori pjesë, për t’u bërë kështu futbollisti që ka realizuar më shumë në historinë e tyre; pas e ndjek një fenomen si Ronaldo, braziliani firmën e të cilit mbajnë 15 gola në aktivitetin më të madh botëror të futbollit.
“Unë festova sukseset e mia më të mëdha me ekipin kombëtar. Kjo kohë ishte e bukur, e kurrë nuk do të harrohet,” thotë vetë ai, Miroslav Klose, që sot ka zgjedhur t’i thotë lamtumirë karrierës si futbollist.
Ai do të shpallej kampion bote me Gjermaninë në Brazil, në Kupën e Botës të dy viteve më parë. Në 2006-tën do të fitonte Këpucën e Artë në Botëror.
Pjesëmarrës në katër botërore e në tre kampionate europiane, Miroslav Klose do të tërhiqej nga futbolli ndërkombëtar dy vite më parë, një muaj pas finales së Kupës së Botës.
Më 1 korrik të 2016-s mbaroi për Klose-n kontrata me Lacion. Që atëherë ai nuk u pa më të luante.
Tanimë 38 vjeç, tërheqja e tij përfundimtare nga futbolli u lajmërua sot.
Lënia e futbollit prej Miroslav Klose-s është një lajm prekës për të gjithë ata që e pëlqenin lojën e tij, që i pëlqenin golat e tij.
Me të mbyllet dhe një kapitull tjetër i lojtarëve të klasit, i sulmuesve të klasit që ka patur Gjermania në dekada.
Miroslav Klose nuk do të luajë më, nuk do të shënojë më. Portierët mund të ndjehen paksa të lehtësuar! Nuk do të rrezikojnë më ta pësojnë nga një qendërsulmues i vërtetë race! /tesheshi.com/
