Kapja e Abdulkadir Masharipovit mbrëmjen e shkuar në Stamboll i dha fund kërkimit të gjatë për të në tërë Turqinë, si përgjegjësi për vrasjen e dhjetëra personave në të mirënjohurin klub nate Reina.
Prefekti i Stambollit, së bashku me drejtorin e policisë, kanë dalë sot para gazetarëve për të dhënë hollësi mbi operacionin e kapjes së terroristit, si dhe mbi vetë atë.
Vasip Shahin u ka thënë gazetarëve se nuk ka dyshim që terroristi e ka kryer sulmin në emër të ISIS-it, duke bërë të njohura më tutje të dhëna për Masharipovin.
“Abdulkadir Masharipov ka lindur në vitin 1983 në Uzbekistan, është përgatitur në Afganistan, e zotëron mirë katër gjuhë. Mendohet se ka hyrë ilegalisht në vend në janar të 2016-s.”
I njohur me emrin kod Ebu Muhammed Horasani, ai u kap me një person me origjinë irakiane, e me tre femra me origjinë afrikane dhe egjiptiane. Mësohet se terroristi nuk e kishte pranë fëmijën e tij 4.5 vjeç në kohën e operacionit, siç është pretenduar më herët.
Dy pistoleta, dy dronë, dhe 197 mijë dollarë janë gjetur gjatë operacionit, ka sqaruar prefekti i Stambollit.
Terroristi ka marrë fillimisht një shtëpi me qira në Bashakshehir me të ardhur në Stamboll, për të lëvizur në banesa të tjera gjer në ditën e sulmit në Reina. Në operacionin e djeshëm të forcave të sigurisë janë kryer bastisje në pesë adresa, në njërën prej të cilave u kap dhe Masharipovi. Veç tij, 50 janë të ndaluarit tani për ngjarjen.
Sipas prefektit të Stambollit, ai e ka pranuar krimin. /tesheshi.com/
