Aqif Rakipi, apo siç e thërrasin të gjithë “Qifja”, të cilit sot ju hoq mandati i deputetit, është një emër i njohur që prej 5 vjetësh në politikën shqiptare si “njeriu i fortë i Peqinit” dhe që akuzohet nga PD si “miku i Edi Ramës” .
Por në fushatën e zgjedhjeve parlamentare të vitit 2013, Qifja u sulmua fort nga Edi Rama dhe ishte aleat me Partinë Demokratike. Pinjoll i një familje të madhe në Peqin, megjithatë Aqif Rakipi ka lindur në Durrës më 1 prill të vitit 1964. Pjesëtar i një fisi me origjinë nga Çamëria dhe që ushtronte ativiteti biznesi, vetë Aqif Rakipi ka që prej vitit 2000 që është një sipërmarrës në fushën e mineraleve, ku zotëron disa kompani.
I prerë për biznes dhe aspak për shkollë, tipik nga ata që kushte klase qëndronte në bankën e fundit, Qifja edhe pse ka pasur para me shumicë, nuk i ka shkuar mendja që të blejë një diplomë. Ai është deputeti i vetëm i parlamentit shqiptar që nuk ka arsimin e lartë. Në CV-në e tij të shkurtër në Kuvend, Rakipi ka shkruar se ka përfunduar arsimin e mesëm.
Ai ka deklaruar se ka një eksperiencë profesionale si biznesmen dhe është marrë me aktivitet ekonomiko – shoqëror në sektorin privat, kryesisht në fushën e shfrytëzimit të burimeve natyrore (miniera) si dhe ka mbajtur pozicionin e drejtuesit dhe anëtarit të bordit, në bizneset e tij.
Rakipi ka qenë pjesëmarrës dhe aktivist në Shoqatën Çamëria. Ai është Anëtar i Kryesisë së Partisë Drejtësi Integrim dhe Unitet. Ai është zgjedhur Deputet i Kuvendit të Shqipërisë, përfaqësues i Partisë Drejtësi Integrim dhe Unitet, për qarkun Elbasan, prej vitit 2013.
Në zgjedhjet e qershorit të 2013-s, Aqif Rakipi u përplas egër me Alfred Pezën në Peqin dhe kishte synim që të nxirrte deputet edhe Dashnor Sulën e PD-së, me të cilin kishte edhe lidhje të ngushta. Nuk ja doli ta bëjë Dashin deputet, por ja doli të largojë Alfred Pezën nga Peqini. Pas fitores së PS-së në zgjedhje u afrua me Edi Ramën dhe arriti një pakt me të që ta bëjë Peqinin “feudin” e tij. Kryeministri i jep “carta bianca” pasi ishte nevojë për mbështetje politike, duke parë problemet e mëdha me LSI-në në zonë .
Afrimi me Ramën e ktheu Qifen si njeriun më të rëndësishëm të PDIU-së, sidomos me oparacionin “Dibra” ku pas skandalit të Shuke Xhelilit, PS-ja rrrezikonte që të merrte një tatëpjetë që mund t’i rrezikonte mandatin. Qifja shkon vetë në Dibër dhe qëndron gjatë gjithë fushatës atje, duke afruar një njeri të sërës së tij, bisnesmen me muskuj si Ymer Lala, i cili mbledh rreth vetes “çamët e Dibrës” (në thonjëza pas Dibra nuk ka këmbë çami).
Ky lobim arriti që ta kthejë PDIU-në në Dibër më të fortë sesa LSI-ja dhe ta kthejë PD-në nga më e forta në rreth, në partinë e dytë. Në zgjedhjet e pjesshme, socialistitët, falë edhe një kandidaturë të përzgjedhur me kujdes siç ishte diktor Rema, fitojnë me mbi 4 mijë vota më shumë.
Por kjo fitore, edhe pse për Ramën do të thoshte mosrrëzim nga grushtat e Metës dhe Berishës, kishte për të një risk të madh: do t’i duhej të përballej me lojën allasoj të Qifes, i cili kërkonte të merrte pozicione të forta.
Në zgjedhjet e 25 qershorit, Qifja u bë edhe më i fortë se Shpëtim Idrizi, për shkak se ky i fundit në fund bëri pakt me Metën në mbledhjen e famshme të 17 majit për ta rrëzuar Edi Ramën. E siç dihet, me një lëvizje dhelparake dhe inteligjente bashkë, Rama u takua veçmas me Bashën dhe rrëzoi të gjithë të vegjlit.
Më 25 qershor Aqif Rakipi arriti të marrë në qarkun Elbasan dy deputetë, duke u bërë armik i ashpër me LSI-në që në Elbasan dërgoi Monika Kryemadhin, por edhe PD-në që e la me dy deputetë më pak se në 2013-n. E pak përpara se të mblidhej parlamenti i ri, Rakipi kreu një aksident me vdekje në autostradën Tiranë-Durrës, i cili qe në fakt dhe nisja e mbylljes së një karriere të vrullshme e të sforcuar politikisht. Sot ndodhi vetëm akti i parafundit.
Kurse Gledion Rehovica nuk e ka peshën e Aqif Rakipit. Madje ai ka qenë i pazëshëm në politikë, për aq sa qëndroi deputet dhe nuk la shenja të dukshme protagonizimi, sikur shoku i tij i fatit të njëjtë, Qifja.
Megjithatë ai përfaqëson sërish një “të fortë” i cili arriti t’i sigurojë LSI-së deputetin e dytë në qarkun Berat në vitin 2013, duke marrë edhe bashkinë dy vjet më pas.
Pasi ka punuar në forcat specialë në vitet ‘90 dhe si drejtues policie kur Ilir Meta ishte Kryeministër, Rehovica pati poste të larta në Alpetrol dhe te Posta Shqiptare gjatë kohës së koalicionit mes PD-së dhe LSI-së.
Në zgjedhjet e fundit më 25 qershorit u përplas fort me Blendi Klosin, i cili luftoi që ta ndalte LSI-në në Berat. Megjitha Rehovica arriti të njëjtin rezultat si në vitin 2013, pra përveç Nasip Naços doli edhe ai parlamentar i LSI-së. /tesheshi.com/
