Nga Alba Skëndaj
Kryeministri Edi Rama pasi mbaroi punë me “aleatët e tepsisë” ka nisur të gjejë “armiqtë” brenda vetes për dështimet e 4-vjeçarit të shkuar qeverisës.
Sot ai u ka bërë një “dush të ftohtë” ambasadorëve dhe shefit të tyre, ministrit Ditmir Bushati, që në 4 vite ka qenë gati i paprekshëm nga akuzat, përveç përfoljeve që i bënte Sali Berisha për çështje private, jo të diplomacisë.
Por, Rama la të kuptohej qartë se Bushati nuk do të ishte më ministër në kabinetin e ri duke e quajtur diplomacinë “atavike” dhe duke e krahasuar me kohën e komunizmit në rutinën e saj. Për këtë arsye Rama tha se duhet një përmbysje e madhe, një ripërtëritje dhe kreativitet në Ministrinë e Jashtme.
Për koiçidencë në krye të ministrisë ai vetë kishte zgjedhur një bir komunisti, djalin e Sul Bushatit, ish-sekretar i Partisë së Punës në Shkodër, zonën që ka vuajtur më së shumti nga komunizmi.
Hija e të atit të Ditmir Bushatit vijon të ngjallë zemërim në këtë qytet, ku mijëra familje janë internuar dhe persekutuar nga komunizmi, sigurisht nga zyrtarët e komunizmit të cilët njiheshin me emër e mbiemër.
Por, e shkuara e familjes nuk e pengoi të birin që në sistemin demokratik, kundër të cilit luftoi i ati, të shkollohej dhe të bënte karrierë politike në partinë trashëgimtare të Partisë së Punës. As ai e vetë nuk e bëri kurrë hasha të atin, përkundrazi është shprehur se ndihej krenar për të, ndryshe nga shumë bij komunistësh që u distancuan nga baballarët pas 90-ës.
Ditmir Bushati, i lindur në Shkodër me dy prindër shkodranë, duket se nuk asnjë lidhje me vendlindjen pasi nuk ka asnjë gjurmë të dialektit të bukur geg që kjo zonë e flet dhe e ruan me një lloj fanatizmi.
Rikthimi i tij në këtë qytet u bë me “urdhër” të Ramës, i cili e vendosi në listën e qarkut Shkodër pas 2 mandatesh deputeti të marra në Tiranë.
Me një imazh në dukej të një shkollari, me syze dhe një qetësi në komunikim, Bushati është një nga ministrat më të përgatitur nga ana akademike në qeverinë Rama, me trajnime nga universiteti i Athinës, Hollandës e deri në Harvard. Por mesa duket diplomat dhe specializimet e tij nuk e kanë ndihmuar që të jetë “shefi reformator” i ambasadave të zymta shqiptare nëpër botë, ku siç tha vetë Rama ka “gjithëfarëlloj parazitësh të katapultuar për arsye nga më të ndryshmet, përveç arsyes për t’i shërbyer vendit”.
Ai nuk arriti të spastronte përfaqësitë diplomatike nga “diplomatët delenxhinj”, ndërsa u përpoq të punonte në krijimin e imazhit të tij si i barabartë mes të barabartëve në arenën ndërkombëtare.
Në 4 vitet e qëndrimit si kryediplomatik, Bushati nuk ka lënë ndonjë gjurmë që mund të mbahet mend, por ka lënë patjetër disa gafa që nuk mund të harrohen.
Bushati e ka quajtur qytetin shqiptar të maqedonisë, Manastirin me emrin serb Bitola duke shkaktuar shumë debat në vend.
Edhe pse u përpoq të krijonte idenë se po punonte për zgjidhjen e çështjes çame ai buzëqeshi kur homologu i tij grek e thërriti me emërtimin greqisht të emrit të tij Dhimitër.
Edhe nëse do të quanim një fitore të diplomacisë shqiptare qëndrimin e shtetit shqiptar ndaj krizës në Maqedoni dhe bashkimin e faktorit shqiptar atje me atë që u quajt “platforma shqiptare”, ky nuk është një sukses i Bushatit, por një investim drejtpërdrejt i vetë Ramës.
Nuk dihet akoma se kush do t’a zëvendësojë Bushatin, por sigurisht Rama do të ketë menduar për një profil antagonist të Bushatit, një dorë të fortë që t’i reformojë përfaqësitë diplomatike dhe të jetë më i drejpërdrejtë dhe i vendosur në arenën ndërkombëtare, kur vjen fjala për çështje kombëtare me rëndësi si Kosova, çështja çame dhe mbrojtja e të drejtave të qytetarëve shqiptarë kudo që ndodhen. /tesheshi.com/
