Nga Blendi Gashi
Dikur Partinë Demokratike të Kosovës (PDK) e quante parti të krimit të organizuar dhe subjekt politik që mban pushtetin me dhunë. Por, pas ca vitesh u dorëzua dhe tash e vlerëson si parti shtetformuese. Kjo është politikanja e transformuar, ish-vetëvendosësja Ajnishahe Halimi, e cila dje së bashku me disa themelues të iniciativës Fraksion +, zyrtarisht u rreshtua krahë të fortit, kujt tjetër. përveç Kadri Veselit, kreut të ri të PDK-së, njëherit kryetarit të Kuvendit.
Gruaja e fortë anti-PDK, që kritikoj në vazhdimësi tashmë partinë e saj në qytetin nga ajo vjen Skënderaj, konkretisht kreun e komunës, Sami Lushtakun një ndër kokat e PDK-së, bashkimin me partinë më të madhe në vend e quajti natyral, derisa u shpreh e bindur se do ta luftojë të keqen.
Thaçi e Lushtaku sundojnë përmes korrupsionit
Ish-vetëvendosësja dhe ish-fraksionistja Halimi, nuk akuzonte veç Lushtakun por edhe Hashim Thaçin ish kreun e PDK-së, njeriun më të afërt të Kadri Veselit.
Thaçin e quante sundimtar të korrupsionit, ndërsa PDK-në në Skënderaj e akuzonte se i vodhi votat asaj në garën lokale për kryetare të Skënderajt ku garoi për Vetëvendosje-n.
“Politikanë si Hashim Thaҫi dhe Sami Lushtaku sundojnë përmes korrupsionit dhe frikës që përhapin në popull dhe, për të mos përfunduar në burg, bëjnë koncesione nëpër negociata me Dacicin në dëm të popullit shqiptar. Misioni i EULEX’it është këtu për të siguruar që këto negociata të shkojnë deri në fund dhe jo për të vendosur drejtësi. Kur ligjin e bën Maliqi, nuk ka drejtësi, e aq më pak drejtësi ka kur Maliqin e mbajnë në pushtet ndërkombëtarët!”, deklaroi kohë më parë Halimi, kuptohet në kohën kur përfaqësonte VV-në në Skenderaj.
Ajnishahe Halimi, tashmë anëtare e PDK-së, akuzonte komunën e Sami Lushtakut se në Skënderaj asnjë tender, asnjë pronë nuk mund të merret e madje askush nuk mund të punësohet, qoftë ai edhe rojtar, pa qenë i afërt i pushtetit e konkretisht i Sami Lushtakut.
Halimi kundërshtoi betimin e Sami Lushtakut: Ofenduese betimi me policë në sallë
Ajnishahe Halimi, bojkotoi ceremoninë e betimit të kryetarit Sami Lushtaku që u mbajt më 3 janar të vitit 2014-të.
Ajo deklaroi në atë kohë se është ofenduese ajo çfarë ngjau në Skenderaj; betimi i Kryetarit me policë të EULEX-it në sallë.
“Në sallën e Kuvendit të Komunës së Skënderajt sot u dha një shfaqje teatrale me kukulla. Në shfaqjet me kukulla, aktorët e vërtetë nuk janë kukullat, por ata që rrinë prapa perdeve dhe përmes penjve të padukshëm ua lëvizin gjymtyrët, madje edhe ua hapin e ua mbyllin gojën këtyre kukullave. Të qëndrosh prezent gjatë një shfaqjeje të tillë teatrale është ofenduese për këdo që sot më shumë se kurrë kërkon drejtësi. Kjo shfaqje është ofenduese për të gjithë qytetarët e Skenderajt. Ajo që ka ndodhur sot tregon edhe një herë se EULEX dhe Sami Lushtaku nuk janë kundër njëri-tjetrit; shfaqja e sotme tregon se të dyja këto palë janë në bashkëpunim kundër interesave të popullit”, tha ajo, përmes një deklarate.
Halimi: Këngëtarja Leonora Jakupi bashkëpunëtore në krim të organizuar me Lushtakun
Madje Halimi në kohën sa ishte asambleiste e Vetëvendosje-s hedhi akuza edhe ndaj këngëtares Leonora Jakupi, si bashkëpunëtore në krim të organizuar me Sami Lushtakun.
“A është e vetëdijshme Leonora Jakupi që është bashkëpunëtore në krim të organizuar?”, ka thënë Halimi, pas vendimit që mori Komuna e Skënderajt për ndarjen e parcelave.
Por, këngëtarja Leonora Jakupi, në një emision televiziv në vitin 2014-të paralajmëroi ngritjen e një padie ndaj tashmë zyrtares së PDK-së Ajnishahe Halimit. /tesheshi.com/
