Suzana Guxholli është e para grua që do herohet për abuzim me fondet publike pas denoncimit të Ministrisë së Energjetikës.
Doktore në ekonomi që në vitin 1992, 60-vjeçarja që ka dhënë mësim në katedrën e Universitetit të Tiranës, gjatë qeverisjes 8-vjeçare të Partisë Demokratike, ka qenë një nga këshilltarët më influente të Kryeministrit të atëhershëm, Sali Berisha.
Guxholli, ka mbuluar marrëdhëniet e Berishës me një grup investitorësh të huaj që merreshin me energjitikën dhe burimet natyrore.
Në vitin 2012, Kryeprokurori aktual, Adriatik Lalla, i cili ishte në rolin e Kryeinspektorit të Deklarimit të Pasurive, akuzoi këshilltaren e Berishës se nuk ka futur në evidencën zyrtare shumën prej 1 milionë dollarësh, që sipas ILDKP-së ajo e zotëronte, por që e kishte deklaruar tek ish-bashkëshorti i saj me të cilin ishte divorcuar.
Ndërkohë ajo është paditur edhe nga Posta Shqiptare se ka marrë shpërblime si anëtare e Këshillit Mbikqyrës të këtij institucioni.
Ndërkaq, në padinë e Ministrisë së Energjetikës, Guxholli bashkë me ish-zyrtarët e tjerë, akuzohet për çështjen e privatizimit të Operatorit të Sistemit të Shpërndarjes, i cili në vitin 2009 iu shit kompanisë çeke “CEZ”.
Guxholli në fakt është një prej grave më të shkolluara dhe të përgatitura të ish-qeverisë Berisha” Ajo është hartuese e mjaft studimeve e botimeve në fushën e ekonomisë, ndërkohë që ka mjaft eksperienca pune në vende si Kosovë, Maqedoni, Hungari, Turkmenistan, Poloni e Itali.
Flet shkëlqyeshëm gjashtë gjuhë të huaja. Por gjatë rolit të saj si këshilltare e Kryeministrit ajo u përfshi shumë në disa afera që më pas sollën akuzat nga opozita e asaj kohe dhe media.
Ndryshe nga disa kolegë të saj si Selami Xhapa dhe Agron Kuçi, zonja Guxholli ishte më shumë se këshilltare, por një negociatore dhe agjitatore e qeverisjes së Partisë Demorkatike.
Në tryezat e përnatshme të ekraneve televizive, prania e dr.Guxholli ka qenë mjaft e shpeshtë.
Ajo rezulton se ka qenë një nga emrat që ka përfituar edhe nga e ashtuquajtura “afera Partizani” ku klubi sportiv me të njëjtin emër u shit nga ministria e Mbrojtjes, një grupi ish-pronarësh ku një pjesë e konsiderueshme kishte lidhje familjare apo politike me kreun e qeverisë së atëhershme, Sali Berisha.
Në zgjedhjet e fundit vendore, Guxholli u zgjodh si këshilltare e Partisë Demokratike për Bashkinë e Tiranës. /tesheshi.com/
