Zgjedhjet në rradhët e laburistëve, ofruan suprizën tjetër pas asaj të shpalljes së radikalit të majtë Jeremy Corbyns, si lider i ri i tyre, një lloj “Tciprasi” i thyer në moshë.
Sadik Khan, me origjinë pakistaneze, 45 vjeç, ka fituar zgjedhjet paraprake të Partisë Laburiste për Bashkinë e Londrës.
Fëmijë i emigrantëve pakistanez, mysliman, i rritur në një shtëpi për të pastrehët e Londrës, së bashku me 7 vëllezërit e tij, Sadik Khan, në mënyrë suprizë ka arritur të kalojë superfavoriten Tessa Joëell, ish-ministrja e Blair, në zgjedhjet sipas parimit “një anëtar, një votë”.
Nëse në 5 majin e vitit të ardhshëm ai do të fitojë, duke i marrë postin kryebashkiakut aktual Boris Johnson, Khan do të bëhej kryebashkiaku i parë mysliman i Londrës.
Një ngjarje që mund të bëjë historinë e një qyteti ku emigrantët nga nënkontinenti indian janë minoranca më e madhe etnike.
Jeta në Londër
“Londra më ka dhënë mua dhe familjes sime mundësinë e një jete më të mirë”, thotë 45 vjeçari Khan, menjëherë pas shpalljes së kandidaturës së tij.
“Ambicja jonë më e madhe është ajo e sigurimit që të gjithë londinezët të kenë këtë mundësi”.
Babai i tij është shofer autobuzi dhe nëna rrobaqepëse; vetë Sadiku ka lindur në Londër në vitin 1970.
I rritur së bashku me 7 fëmijët në një “council house” të kryeqytetit britanik, ai ka studiuar jurisprudencë në Universitetin e Londrës.
Avokat i specializuar për të drejtat njerëzore, në vitin 2005 hyn për herë të parë në Parlament, duke u bërë kështu aziatiku i parë që arrin të çajë në politikën e lartë.
Gjatë opozitës së Ed Milliband ishte ministër Drejtësie i qeverisë “hije”, ndërkaq në vitin 2008 gjatë qeverisë Broën, ka qenë zv.ministër për Komunitetet Etnike dhe Lokale, e më pas zv.ministër i Transporteve.
Sfida
Në fushatën që bëri për të marrë kandidaturën, Khan u mbështet nga ish-kryebashkiaku i Londrës, Ken Livingstone. Me 48.152 vota, gati 58,9% e totalit, fitoi primaret brenda laburistëve në raundin e pestë, pasi eleminoi katër kandidatë të tjerë.
Në majin e ardhshëm, sipas të gjitha gjasave do të ketë përballë deputetin konservator, Zac Goldsmith.
Marrë nga: Corriere Della Sera
Përktheu: Ylli Pata- tesheshi.com
