Nga Blendi Gashi
Rafet Rama, edhe pse është deputet i Kuvendit të Kosovës dhe ka mbajtur disa pozita në institucionet shtetërore, nuk është aq i njohur për opinionin kosovar.
Mirëpo, nga dita e premte 26 shkurt, deputetit nga Drenica do t’i rritet fama. E kjo për vetëm një arsye. Do të jetë kundërkandidat i politikanit më të votuar në Kosovë për president, njëherit kryetarit të tij të partisë Hashim Thaçi.
Edhe vet Rama është në dijeni se ai do të jetë vetëm një kundër-kandidat formal, më mirë të themi i ‘i djegur’, pasi nuk do t’i hynte seriozisht garës për të sfiduar shefin e partisë.
Deputeti nga Skenderaj sigurisht me kënaqësi ka pranuar t’i bëj një argat Thaçit, pasi që Kushtetuta e Kosovës, thotë se në mënyrë që procesi të jetë i rregullt, nevojiten dy kandidatë për të vazhduar votimi për zgjedhjen e presidentit.
Rafet Rama edhe pse është i zgjedhur i popullit, atij nuk i është dëgjuar shpesh zëri në Kuvend.Mund ta përmendim një rast kur ligjvënësi Rama pati ngritur si shqetësim dhe pati
parashtruar pyetje për ministrin e Mjedisit, Ferid Agani, për ndotjen e Lumit ‘Trepça’ që i bëhet nga kombinati ‘Trepça’, konkretisht flotacioni në Stantërg.
Emri i Rafet Ramës është përmendur edhe menjëherë pasluftës, por jo për të mirë. Konkretisht Nazim Bllaca, i vetëquajturi agjent i Shërbimit Informativ të Kosovës (SHIK), ka deklaruar se Rafet Rama, në vitin 2003, derisa ishte pjesë e grupit të Sabit Gecit, ka kidnapuar shokun e tij, Shpresim Ukën, për prishjen e një kontrate të një prone (shtëpi) në lagjen Pejton.
Por, Rama në mënyrë kategorike ka mohuar të ketë qenë i infiltruar në kidnapimin e Shpresim Ukës. Po kush është Rafet Rama?
Rafet Rama, është i lindur më 5dhjetor të vitit 1971 në fshatin Prekaz të Skenderajt. Është i martuar, jeton në Prishtinë me bashkëshorten dhe djalin.
Rafeti, ka qenë oficer në Trubat Mbrojtëse të Kosovës dhe këshilltar në Ministrinë e Punëve të Brendshme për dy mandate.
Ishte një prej këshilltarëve që u shkarkua në vitin 2013-të nga ish ministri i Brendshëm, Bajram Rexhepi, siç ishte thënë në kuadër të ri-formatimit të kabinetit.
Rama ishe shkarkuar pikërisht në kohën e skandalit të pasaportave, por ai pati thënë se largimi i tij nga detyra nuk ka lidhje me skandalin në fjalë që kishte shpërthyer në ministrinë që punonte.
Ka studiuar Menaxhim dhe Biznes në Universitetin për Biznes në Prishtinë. Gjithashtu, ka vijuar shumë trajnime specializimi, ku ndër to edhe atë për Reformat e Sektorit të Sigurisë dhe Qeverisjes në Gjenevë.
Gjatë viteve të ’90-ta, Rama ka qenë Komandant Batalioni në Brigadën 114 ‘Fehmi Lladrovci’ të Ushtrisë Çlirimtare të Kosovës.
Nga viti 1999 deri në vitin 2000, ka qenë këshilltar për Siguri në Ministrinë e Rendit, në Qeverinë e Përkohshme të Kosovës dhe nga viti 2000 deri në vitin 2003, ka qenë zyrtar për trajnime në Trupat e Mbrojtjes së Kosovës.
/tesheshi.com/
