Për shumë vetë mund të bëjë çudi se si mund të ndodhë në partinë e Ilir Metës të bësh karrierë vetë, pa kaluar nga filtri dhe prova spartane e kryetarit.
Por Përparim Spahiu, realisht është një independent jo vetëm në politikë, por edhe në LSI-në, ku për 3 vjet e ka treguar duke mbajtur profilin e tij autonom megjithëse me marrëveshje të qartë me Metën.
I dalë deputet në Bulqizë, një zonë periferike, Spahiu u bë protagonist në politikë në disa çështje duke mbajtur qëndrime edhe jashtë linjës zyrtare të partisë së tij.
Edhe pse numri dy i grupit parlamentar të LSI-së, Përparim Spahiu, rrallë apo asnjëherë ka dalë nga selia duke e identifikuar veten si partiak-apartatçik, që në fakt nuk është.
Më 6 nëntor, Spahiu ka shumë e shumë gjasa që të mos fitojë përballë kreut të Kuvendit, por ka gjithashtu shumë e shumë gjasa të bëhet numri dy i Lëvizjes Socialiste për Integrim, me një qëndrim të padiktuar nga “kryetari i madh”.
Rimi, siç e thërrasin njerëzit e afërt të tij, ka hyrë në politikë si pasojë e një marrëveshjeje dhe jo në mënyrën klasike siç ndodh në LSI ku përgjithësisht karrierat dhurohen nga Ilir Meta.
Kryetari i LSI-së, e ka pasur Dibrën një “telash” që pas rezultatit jo shumë të mirë të Monika Kryemadhit në zgjedhjet e vitit 2005, e cila është nga ajo trevë dhe ka qenë shumë e lidhur.
LSI-ja në Dibër u themelua në 2004-n duke marrë kreun e bashkisë, Bajram Krashin dhe më pas arriti në një kolaps që nuk po rikuperohej.
Ylli Manjani, i sapo larguar nga PS-ja në LSI, i propozon Ilir Metës një djalë me të cilin rrinte shpesh në Tiranë me miqësi të përbashkëta, e që kishte edhe lidhje familjare.
Ai ishte Përparim Spahiu, një bankier me karrierë brilante në Tiranë, si një nga drejtuesit e Bankës Amerikane.
Përfaqësues i një nga familjeve më qytetare të Bulqizës, me reputacion tejet pozitiv në të gjithë komponentët e saj, Përparim Spahiu ishte për Ilir Metën “asi” që i kishte munguar prej kohësh.
Si në kohën e komunzimit ashtu edhe në këto 25 vjet, familja e Rimit ka punuar në Bulqizë duke kultivuar qytetari e respekt.
Lokali i familjes Spahiu është emblema e qytetit të vogël të Bulqizës, por me një histori të pasur e interesante.
Ndërkaq, Rimi në Tiranë pasi mbaroi Ekonomikun ku ka qenë paralel me Ilir Metën si student, ngriti shkallët e karrierës në institucionet financiare ndërkombëtare.
Me të gjithë këtë background, Spahiu ishte një “xhevahir” që Ilir Meta nuk e la të ikte: i plotësonte të gjitha cilësitë për një deputet të mundshëm.
Zgjedhja si deputet i Bulqizës për Rimin në vitin 2013 ishte si një shëtitje.
Spahiu jo vetëm mori votat për vete që ta zgjedhin deputet në Bulqizë, por arriti të korrë mbështetje edhe në Dibrën e epërme dhe në Mat, duke iu afruar deputetit të dytë për LSI-në.
Dy vjet më pas, në 2015-ën, Përparim Spahiu i dha Ilir Metës fitoren më të bindshme për kryetar bashkie, gjë që LSI e arriti me vështirësi edhe në zona si Gjirokastra e Berati që ishin tradicionalisht të majta.
Spahiu ka qenë kontestuesi i parë i Shukri Xhelilit të Peshkopisë, dhe për të cilin u hodhën akuza se ka përgatitur kurthin për kryetarin famëkeq të shkarkuar të Dibrës, pas një videoskandali seksual.
Nuk ka qenë i afeksionuar asnjëherë nga “Rilindja” e Edi Ramës dhe këtë e ka thënë publikisht, madje edhe në Kuvend kur akuzonte qeverinë për mosmbajtjen e premtimit të Rrugës së Arbrit.
Së fundi u bë protagonist kur kundërshtoi ambasadorët për vettingun, por në finale votoi reformën.
Meta e “ngriu” dhe më pas e ktheu në grupin parlamentar pas deklaratës së rrezikshme.
Sot Përparim Spahiu ka vendosur të kandidojë për kreun e LSI-së, duke garuar me themeluesin e kësaj force që nuk është parti e mirëfilltë.
Natyrisht që ai si financier e ka llogaritur mirë që probabiliteti për të fituar është shumë i vogël, por më i vogël është gjithashtu koefiçenti që e bën Rimin realisht numrin dy të LSI-së duke lënë në hije jo vetëm profesor Shezaiun, por edhe “ujqit e vjetër”, Petrit Vasilin, Luan Ramën dhe Edmond Haxhinaston.
E më e rëndësishmja, duket se Përparim Spahiu do të përbëjë armën e Ilir Metës për të ndalur revanshin e Edi Ramës në Dibër, pikërisht në zgjedhjet e 2017-ës, për të cilë kreu i LSI-së ka kohë që punon, por që në garën e fundit thjesht nxori dy palët në “pritë” për t’i llogaritur forcat më me kujdes. /tesheshi.com/
