Nga Ylli Pata
Pas arrestimit të një ish-ministri siç është Spiro Ksera, prokuroria për herë të parë ka kërkuar dënimin e një qeveritari të lartë (normalisht jo në detyrë).
Prokuroria e Përgjithshme ka dorëzuar në Gjykatë kërkesën për 1 vit burg për ish-ministrin e Arsimit, Myqerem Tafaj.
Tafaj, ish-anëtar i kabinetit “Berisha 2”, akuzohet për shpërdorim detyre. Sipas akuzës, dëmi i shkaktuar nga veprimet e tij arrin në një milion euro. Kolegji Penal i Gjykatës së Lartë është tërhequr ndërkohë për të marrë vendimin.
Konkretisht, Tafaj akuzohet se ka akredituar universitete në shkelje me ligjin, ndaj dhe ishte dërguar për gjykim në Gjykatën e Lartë që prej tetorit të vitit 2015.
Në njoftimin e atëhershëm të Prokurorisë së Përgjithshme, u tha se Tafaj kishte vendosur hapjen e programeve mësimore të një shkolle të lartë private në kundërshtim me atë që kishte vendosur Këshilli i Akreditimit.
Profili
Po kush është Myqerem Tafaj, i cili para disa “peshqve” të mëdhenj të abuzimit me pushtetit po përdoret si “kokë turku” në kuadër të fushatës së arrestimit të “Al Kapones”?!
Myqerem tafaj, deputeti i Partisë Demokratike i zgjedhur në Kamëz, është një akademik i njohur që doktoraturën e ka kryer në Gjermani, ku dhe ka punuar për disa vite si profesor Universiteti.
Me origjinë nga Golloborda e Dibrës, Tafaj ka përfunduar Unversitetin Bujqësor të Kamzës, për Veterinari, dhe më pas ka punuar si pedagog.
Ai kryer të gjithë kualifikimet pasuniversitare dhe doktorimin në Stuttgart-Hohenheim, Gjermani. Gjatë qeverisë së parë të Partisë Demokratike, veterineri nga Dibra nuk u përfshi fare në politikë, por vetëm në vitin 1996 u thirr nga Sali Berisha si këshilltar.
Një vit më pas, kreu i PD-së e propozi për ministër Arsimi në qeverinë e Pajtimit të Kombëtar që drejtohej nga socialisti Bashkim Fino. Pas vitit të mbrapshtë, Tafaj la sërish politikën e shkoi sërish në Gjermani ku punoi si profesor.
Por në vitin 2005, Sali Berisha kur themeloi KOP-in e famshëm ftoi edhe professor Myqerem Tafajn, i cili nuk ia prishi mikut të tij dhe për katër vitet e mandatit të parë të PD-së 2005-2009 shërbeu si këshilltari primar i Kryeministrit për Arsimin.
Në këtë kohë, Genc Pollo, ministri i mandatit të parë të Berishës, e ktheu vendin në një grumbull masiv universitetesh private që shpërndanin diploma pa hesap.
Në mandatin e dytë, kryeministri Sali Berisha emëron këshilltarin e tij për ta zbutur zallamahinë e diplomave-letër që po bënin namin dhe bliheshin nga kushdo.
Në emërimin e tij si ministër, Myqerem Tafaj premtoi se do ta rregullojë tregun, por këtu universitete ishin kthyer në fuqi potenciale që po diktonin politikat.
Dy vjet më pas, në vitin 2011, universitetet private diktuan në zgjedhjen e kreut të bashkisë së Tiranës dhe u kthyen në lobin më të tmerrshëm që ndikonin në kupolën e lartë.
Berisha e çoi Tafajn në zonën e Kamzës me një mision shumë të rëndësishëm: të grumbullonte sa më shumë vota që të “mbyste” diferencën e majtë në Tiranë.
Dhe profesori e zbatoi dy herë me korrektesë porosinë: i dha PD-së nga Kamza 8 mijë vota diferencë që shërbyen në 2009-ën që të fitojë qarkun e Tiranës dhe në 2013-n që të mos fundoset shumë thellë.
Arriti të zgjidhet deputet, por Tafaj nuk mori pjesë kurrë në kupolën e re që e ngriti Lulzim Basha.
Në opozitën e zhurmshme të të enjteve marramendëse të Kuvendit, Myqerem Tafaj nuk mbajti kurrë një fjalim të ashpër dhe me sharrje; edhe kur dikush e shiti nga selia blu për ta ofruar si “kompensim” në fushatën për kapjen e Al Kapones.
Fushata ka nisur nga profesorët, e jo nga peshkaqenët!
/tesheshi.com/
