Nga Blendi Gashi
Marjan Dema është zgjedhur rektor i ri i Universitetit të Prishtinës “Hasan Prishtina”. Ai ka marrë shtatë vota të anëtarëve të Këshillit Drejtues që në raundin e parë.
Në garë për këtë post kanë qenë Afrim Hamidi, profesor i asociuar në Fakultetin e Bujqësisë dhe Veterinarisë, Xhevat Berisha, profesor në Fakultetin e Inxhinierisë Mekanike dhe Nuredin Mestani, profesor në Fakultetin e Bujqësisë dhe Veterinarisë.
Këtë post, Dema do ta marrë që nesër, më 1 prill.
Ja cila do të jetë puna e parë e rektorit të ri Demaj
Rektori i sapozgjedhur, Marjan Dema, ka falënderuar të gjithë ata që ia kanë dhënë besimin për të ardhur në krye të UP-së. Ai ka thënë se këtë detyrë do ta kryejë në mënyrën më të mirë të mundshme.
Demaj para mediave ka thënë se këtë detyrë do ta nisë me nënshkrimin e diplomave që kanë mbetur pa u nënshkruar.
Duke parë se karriga e të parit të UP-së është tejet e ‘nxehtë’, pasi ka ‘djegur’ disa rektorë në Kosovë, mbetet të shihet se sa do të qëndrojë i ulur në këtë karrige Dema, pasaradhësi i ish- rektorit Zejnullahu, dhe se a do të ballafaqohet me protesta qysh në ditët e para të tij në këtë pozitë.
Një gjë e tillë mund të ndodhë fare lehtë pasi profesori i matematikës, Marjan Dema është akuzuar ngjashëm sikurse ish-rektori Ibrahim Gashi, për avancime me punime të publikuara në Indi.
Për më tepër, si edhe disa nga rektorët e kaluar edhe Marian Dema është i lidhur me politikën.
Në vitin 2010 ka marrë timonin e Partisë Shqiptare Demokristiane (PSHDK) dhe ka lidhur koalicion me Partinë Demokratike të Kosovës (PDK) e ish- kryeministrit Hashim Thaçi për zgjedhjet e përgjithshme të mbajtura atë vit.
Nga këto zgjedhje, PSHDK dhe vet Marjan Dema kanë dalë të humbur, duke mos arritur të përfaqësohen në Kuvendin e Kosovës dhe në Qeveri. Për këtë arsye, Dema ka dhënë dorëheqje, duke vazhduar punën në Universitet
Reagimi i parë ndaj zgjedhjes së rektorit të ri
Reagimi i parë ka ardhur nga shoqëria civile, konkretisht drejtori i Institutit për Avancime (GAP), Agron Demi i cili e ka quajtuar rektorin e ri si kandidat të pasuksesshëm në listën zgjedhore të PDK-së.
Sipas tij, sot në Kosovë për të pasur një post politik mjafton të kryeni shkollën dhe praktikën ta kryeni në PDK ose LDK.
Po kush është Marjan Dema?
Marjan Dema është profesor në Fakultetin e Inxhinierisë Elektrike dhe Kompjuterike (FIEK), pranë UP-së. Dema është mësimdhënës në lëndët e nivelit Bachelor, Matematika 1 dhe Matematika 2. Ndërkaq, në Master jep Metodat matematikore në inxhinieri.
Dema është 59-vjeçar dhe karrierën e ka filluar në Departamentin e Matematikës të FSHMN-së në vitin 1980. Në vitet e 90-ta është transferuar në Fakultetin Ekonomik, ku ka ushtruar edhe detyrën e prodekanit, ndërsa me të shpërthyer lufta në Kosovë, është larguar me familje në SHBA ku ka qëndruar deri në vitin 2005.
Atëherë është kthyer për një kohë në Departamentin e Matematikës, ndërsa në vitin 2007 ka vazhduar karrierën në FIEK. Po atë vit është zgjedhur prorektor i Universitetit të Prishtinës, në kohën kur rektor ka qenë Enver Hasani.
Marjan Dema, njeh tre gjuhë të huaja, gjuhën angleze, serbo kroate dhe posedon njohuri themelore.
Është i martuar dhe ka katër fëmijë.
/tesheshi.com/
