Nga Blendi Gashi
Me 47 vota të deputetëve të Kosovës, Shaip Havolli, të enjten u zgjodh drejtor i ri i Agjencisë kundër Korrupsionit, ku mposhti kandidatin tjetër, Burim Sadiku, i cili mori votat e vetëm 31 deputetëve.
Havolli vjen në këtë post pas Hasan Pretenit, që e mbajti atë për dy mandate.
Sa ishte epror i krimeve ekonomike, Havolli u zotua se aksionet e ndëmarra do të largojnë të gjithë uzurpatorët e pronave shoqërore dhe atyre të privatizuara.
“Ju bëjë thirrje uzurpatorëve që të largohen nga pronat e uzurpuara ose policia do t’i largojë sipas ligjit”, deklaroi Havolli në një konferencë për media që mbajti së bashku me kryeprokurorin e shtetit, Aleksandër Lumezi më datë 6 maj të këtij viti.
Por ky deklarim, ka mbetur vetëm i tillë pasi shumë prona vazhdojnë të jenë të uzurpuara në mbarë Kosovën.
Një aksion për largimin e uzurpatorëve nisi vetëm në muajt e fundit të këtij viti, por nuk mund të thuhet nëse ky është një sukses i Havollit, kur kihet parasysh fakti se për 17 vjet uzurpatorët nuk u prekën.
Pas zgjedhjes së Havollit në pozitën e kreut të Antikorrupsionit shtrohet pyetja, sa do të jetë i gatshëm ta parandalojë dhe luftojë korrupsionin?
Për të dëshmuar veten, Havolli ka plotë 5 vite kohë, në mënyrë që më pas të konkurojë edhe për një mandat tjetër në krye të AKK-së.
Përvoja dhe shkollimi i Havollit
49-vjeçari Havolli, që nga viti 2001 është inkuadruar në policinë e Kosovës.
Së pari është emëruar në pozitën e oficerit patrullues në stacionin “qendra në Prishtinë” në fillim të karrierës; pastaj hetues në hetimet e krimeve ekonomike regjionale; emë pas është bërë mbikëqyrës i hetimeve të krimeve ekonomike regjionale; pastaj ushtrues detyre i shefit të krimeve ekonomike dhe korrupsionit, për të përfunduar vetë si shef, në vitin 2008.
Në vitin 2010-2014, emërohet shef i sektorit për hetime të krimeve ekonomike në drejtorinë e hetimeve të krimeve ekonomike, kurse që nga viti 2015 është emëruar shef i sektorit të njësive regjionale për hetimin e krimeve ekonomike dhe korrupsionit, pra menaxher i niveli ekzekutiv.
Havolli ka dhjetëra kurse të përfunduara, e mes tyre edhe atë për të drejtat e njeriut për zbatimin e ligjit dhe për parandalimin e krimeve.
Në trajnimet e tij figuron se ka përfunduar trajnim për anti – pastrim të parave dhe gjurmim të pasurisë, për hetime të shkeljeve tatimore, për hetim të korrupsionit e shumë të tjera.
Ndër më të veçantët përmenden trajnimet në SHBA për krimet transnacionale, por edhe trajnime të tjera në shumë shtete.
Havolli përveç gjuhës amtare flet edhe anglisht dhe serbisht, ndërsa ndër të tjera ka edhe medaljen e besnikërisë nga drejtori i policisë së Kosovës, e cila iu dha në vitin 2011
Ka përfunduar shkollë e lartë teknike në Universitetin e Prishtinës, drejtimi i energjetikës, pra inxhinier i elektroteknikës.
Po ashtu ka të përfunduar fakultetin ekonomik në Universitetin AAB – Administrim biznesi dhe marketing, studimet master, si dhe në Kolegjin Universum, Grada: master i arteve të menaxhimit. /tesheshi.com/
