Nga Mensur Krasniqi
Të mërkurën, revista kroate ekonomike “FORBS” ka publikuar emrat e biznesmenëve më të pasur në Maqedoni. Për dallim nga disa vite me rradhë, ku në krye të kësaj liste qëndronte 72-vjeçari nga Shtipi, Minço Jordanov, këtë vit vendin e tij si më i pasuri e zuri 46-vjeçari nga Shkupi, Jordan Kamçev.
Sipas artikullit të kësaj reviste, biznesmeni Jordan Kamçev për një periudhë të shkurtë kohore arriti që të fitojë hapësirën tregtare në Maqedoni. Disa investime të rrezikshme por në momentin e duhur në sektorin e shëndetësisë dhe bujqësisë, marrjen e disa firmave të vogla, marrëdhëniet e mira me njerëz të qëlluar të kompanive dhe politikës, si dhe vizionet afatgjate dhe planifikimi strategjik, ia kanë siguruar atij vendin e parë në listën e njerëzve më të pasur në Maqedoni.
Duke i’u referuar asaj çfarë shkruan ekonomikja kroate, 46-vjeçari Kamçev është njëri ndër të rrallët që kanë shënuar rritje të profitit dhe pasurisë në vitin që lamë pas, edhe përkundër faktit që Maqedonia po kalon në një krizë të thellë politike dhe ekonomike. Ai gjatë vitit të kaluar e ka shtuar vlerën e kapitalit me 3 milion euro, duke i bërë gjithsej 22,8 milion euro, 300 mijë euro më shumë se i dyti në listë, Minço Jordanov, i cili për një vit ka shënuar ulje prej 5,6 milion euro nga pasuria e tij.
Jordan Kamçev është ekonomist i diplomuar dhe drejtor i shoqërisë aksionere, “ Orka Holding”.
Kjo shoqëri është themeluar që nga viti 1990 nga babai i Jordan Kamçevit, Ilija Kamçev. Në atë kohë “Orka Holding” kishte të punësuar vetëm 60 persona, ndërsa sot në kuadër të kësaj shoqërie janë të punësuar 3700 persona.
“Orka Holding” është aksionere e kompanive më të mëdha në Maqedoni, si spitali klinik “Acibadem Sistina”, kompania e ndërtimtarisë “Beton Shtip”, “Stopanska Banka”, kombinatin bujqësor “Pelagonija”, “OK Hotel”, restorantin elitar “Sushiko” pronar i gazetës së përditshme “Nova Makedonija”, etj.
Në opinion e më gjërë, Jordan Kamçev shquhet si njeriu më i afërt i ish-Drejtorit për Siguri dhe Kundërzbulim, Sasho Mijallkov, pa lejen e së cilit as ish-kryeministri Nikolla Gruevski nuk mundej të vepron.
Jo rastësisht emri i Jordan Kamçevit përmendet edhe në skandalet e përgjimeve në bisedat e publikuara nga ana e opozitës maqedonase para një viti e gjysmë.
Po ashtu, mediat në Maqedoni kanë shkruar se Kamçev njëherë është paraqitur edhe në Prokurorinë Speciale, por pa u zbuluar ende se në çfarë cilësie.
Pas publikimit të lajmit se Jordan Kamçev është biznesmeni më i pasur në Maqedoni, i menjëhershëm ka qenë edhe reagimi i opozitës maqedonase, LSDM-së. Sipas saj, nëse partneri më i afërt i Nikolla Gruevskit dhe Sasho Mijallkovit është pasaniku më i madh në Maqedoni, u vërtetua se ku janë paratë e qytetarëve.
“Nëse Kamçev, i cili merrte tenderët milionëshe nga pushteti në ikje, sipas “Forbs” peshon 238 milion euro, sa peshojnë Gruevski, Mijallkov dhe familja, që i kanë kanalizuar paratë e tyre nëpër vende të ndryshme. Vetëm një firmë Kamçevit ka marrë 7 tenderë në vlerë prej 55 milion euro në projektin Shkupi 2014”, thuhet në kumtesën partiake të LSDM-së.
Në top 5-qen e biznesmenëve më të pasur në Maqedoni, pas Jordan Kamçev dhe Minço Jordanov, renditen: pronari i Makpetrolit, Andrea Josifovski(20 milion euro); pronari i fabrikës së pijeve “Prilepska”, Sasho Samarxhioski (13,3 milion euro)’ dhe pronari i fabrikës së barnave “Alkaloid”, Zhivko Mukaetov (9.8 milion euro). /tesheshi.com/
