Nga Blendi Gashi
Ministria e Drejtësisë në Kosovë që nga sot do të drejtohet nga një grua. Dhurata Hoxha është emëruar në këtë post duke zëvendësuar ministrin e deritanishëm Hajredin Kuçi.
Prezantimin e saj si ministre e bëri vet Kuçi në një konferencë për media nga zyra e PDK-së.
Kuçi thuri lavdata të shumta për Hoxhën duke e cilësuar një ndër kandidatet më të përgatitura në këtë fushë.
“Me punën e saj do të krenohet drejtësia në Kosovë. Hoxha do të rrisë besimin për drejtësinë në Kosovë. Nga sot besoj se do të fillojë detyrën në kabinetin qeveritar”, ka thënë Kuçi.
Një fjalë rasti e mbajti edhe vet ministrja e re Dhurata Hoxha, e cila ishte e pranishme me rastin e publikimit të nominimit të saj, u falënderua për besimin.
“Më lejoni të falënderoj kryetarin (Kadri) Veseli, Kryesinë që unë të emërohem ministre. Besoj që pervoja dhe arsimimi amerikan do të më ndihmojnë në detyrën e re. Shpreh përkushtimin për luftë kundër krimit e korrupsionit mbi parimin se askush nuk është mbi ligjin”, tha ajo.
Po kush është Dhurata Hoxha?
Në vitin 2011 është emëruar këshilltare politike e tashmë ish kryeministritHashim Thaçi.
Përgjegjësitë e saj kryesore mbulojnë fushën e sigurisë kombëtare, sundimit të ligjit, ndjekja e mbledhjeve të Këshillit të Sigurisë së Kosovës, bashkëpunimi dhe ndërlidhja me institucionet e tjera të Kosovës si dhe ato ndërkombëtare të sigurisë.
Para se të emërohej në pozitën e këshilltares së Thaçit, ministrja e re Dhurata ishte këshilltare e ministrit të Punëve të Brendshme që nga tetori 2008.
Ndërsa në Ministrinë e Punëve të Brendshme, Dhurata ka kontribuar në hartimin e legjislacionit kyç të sigurisë, duke përfshirë edhe strategjitë kryesore të sektorit të sigurisë si strategjisë dhe planit të veprimit kundër terrorizmit, strategjisë dhe planit të veprimit kundër krimit të organizuar, strategjisë dhe planit të veprimit kundër trafikimit të qenieve njerëzore, strategjisë dhe planit të veprimit kundër drogave, dhe dokumente të tjera të rëndësishme të sektorit të sigurisë. Ajo gjithashtu ka qenë anëtare e grupit punues dhe ka kontribuar në hartimin e strategjisë së parë kombëtare të sigurisë të Republikës së Kosovës dhe planin e veprimit.
Dhurata ka përfunduar studimet master në departamentin e studimeve të sigurisë, me koncentrim në sigurinë ndërkombëtare, në shkollën e shërbimit të jashtëm, të Georgetown University në Washington DC.
Hoxha ka përfunduar studimet e saj universitare në Graceland University, ku ajo diplomoi në marrëdhënie ndërkombëtare dhe shkenca politike me nderime të larta.
Dhurata ka punuar edhe në ambasadën britanike si Menaxhere e projekeve, si dhe ka punuar edhe në Zyrën amerikane (tani Ambasada e SHBA) në Prishtinë në seksionin POL /ECON.
Hoxha është anëtare e Kryesisë qendrore të PDK-së, si dhe e Kryesisë së PDK-së dega Prishtinë. Në zgjedhjet e fundit, si anëtare e PDK-së, Dhurata kandidoi për deputete të Parlamentit të Republikës së Kosovës.
Hoxha është gjithashtu profesor jo i rregullt në European School of Law and Governance (ESLG) dhe Universitetin Amerikan në Kosovë (AUK), ku ajo ligjeron lëndët si terrorizmi dhe dhuna politike; politika dhe politikat publike; dhe vlerat dhe politikat publike. Ajo ka qenë gjithashtu e përfshirë në shumë projekte si konsulent.
Dhurata Hoxha është një kuadër i ri profesional i edukuar në SHBA, me ekspertizë në sigurinë kombëtare dhe ndërkombëtare.
Ajo është anëtare e Women in International Security (WIIS) me seli në Washington DC. Interesi i saj hulumtues dhe kërkimor përfshin sigurinë ndërkombëtare dhe kombëtare, kërcënimet globale kundër terrorizmit, sigurinë e energjisë, sundimi i ligjit, dhe qeverisja e mirë.
Dhurata jeton në Prishtinë me bashkëshortin Visarin dhe fëmijët Malin dhe Hanën.
