Nga Blendi Gashi
Në vend të austriakes Ulrike Lunaçek, e cila për tetë vite raportoi në Parlamentin Evropian për Kosovën, zërin atje tashmë në vend të saj do e ngrejë një slloven, konkretisht politikani dhe avokati, Igor Soltes.
Edhe ky i fundit, siç bëri Lunaçek për disa vite nga takimet kokë me kokë me liderët kosovarë, pritet ta bëjë thirrjen e njëjtë, të luftohet krimi dhe korrupsioni.
Mesazh tjetër që do përcjellë Soltes do jetë ratifikimi i Demarkacionit me Malin e Zi, çka e bëri të premten në konferencë Lunaçek, e cila i dha lamtumirën Kosovës pasi partia e gjelbërt e saj në Austri humbi zgjedhjet.
Përveç këtyre, raportuesi i ri sigurisht se do përcjellë edhe ngecjen apo përparimin që Kosova do bëjë në hapat drejt BE-së, drejt raporteve me Serbinë, si dhe për fushat si shëndetësia, arsimi etj.
Ja ç’tha në fjalimin e parë Soltes…
Megjithatë, raportuesi i ri i PE-së për Kosovën, në paraqitjen e parë para mediave ka thënë se do të mundohet të bëjë më të mirën e mundshme si raportues i ardhshëm, me bashkëpunim relevant me ministra, kryeministrin, me pozitën dhe opozitën.
Për dallim nga Lunaçek që përcjelli mesazh të qartë tek politikanët kosovarë se pa Demarkacionin mbyllen dyert drejt BE-së, pra s’ka viza, raportuesi Solten u shpreh paksa optimist për të ardhmen.
“Çka është e rëndësishme është sistemi gjyqësor duhet të jetë një sistem i pavarur. Kosova ka nevojë që të rinjtë të rrinë këtu dhe qeveria është në krye të kësaj sfide që të investojë shumë për të rinjtë. E ardhmja e Kosovës është në mesin e vendeve të BE-së. Unë do të mundohem të bëjë më të mirën e mundshme si raportues i ardhshëm, me bashkëpunim relevant me ministra kryeministrin me pozitën dhe opozitën”, tha ai.
Po, kush është Soltes?
Igor Šoltes (i lindur më 1964) është një avokat dhe politikan slloven. Ai shërbeu si president i Gjykatës së Auditorëve të Sllovenisë nga 2004 deri në 2013.
Në vitin 2008, ai mori doktoraturë në Fakultetin e Studimeve Sociale në Universitetin e Lubjanës.
Në janar të vitit 2014, Soltes shihej si një kandidat i mundshëm për Ministrinë e Shëndetësisë, megjithatë, ai vendosi të refuzojë ofertën nga kryeministri slloven Alenka Bratušek për shkak të mungesës së mbështetjes politike në koalicion.
Para zgjedhjeve të Parlamentit Europian 2014, Soltes fitoi 10.45% të votave, duke siguruar një vend në Parlamentin Europian. /tesheshi.com/
