Është kryetar i një Komune të madhe që gjendet në qytetin veriperëndimor të Kosovës, Pejës.
Por ai, jo rrallëherë ka gjetur kohë të bëj deklarata të çuditshme, duke thurur lavde për veten dhe punën që bën, në një mënyrë të pazakontë, shoqëruar me hiperbola të cilat janë skalitur fort në memorien e njerëzve.
I ka dalë punë edhe me nivelin qendor, ku është përplasur me parti politike opozitare, po ashtu prej “gjuhës së gjatë”, siç thotë populli.
Dy nga deklarata që kanë bërë bujë më të madhe në opinion dhe njëkohësisht do të kujtohen gjatë janë:
“Do të qëndrojë në krye të komunës së Pejës deri në vitin 2054”.
“Mund t’u them se unë kam qenë kryetari më i mirë në Kosovë për vitin 2014 sa i përket investimeve kapitale”.
Këto deklarata pra, i ka dhënë kryetari i Komunës së Pejës, Gazmend Muhaxheri i njohur ndryshe edhe si Gazi.
Deklaratë tjetër bombastike e tij, ishte ajo kur e drejtoi gishtin tek njerëz të afërt të Ramush Haradinajt për vrasjen e zyrtarëve të LDK-së pas lufte. Ai tha se rrethi i kryetarit të AAK-së vrau Tahir Zemajn, Sebahate Tolajn, Isuf Haklajn…
Tjetër deklaratë e Gazit që ka bërë bujë në media, ishte ajo kur pranoi shkeljen e ligjit me tendera publikë. “E kem shkel ligjin, po nuk e kem shkel livadhin”.
Kryetari i Pejës kishe pranuar në media se ka militantë partiakë nëpër borde të ‘Ambientit’, ‘Kosovatransit’ dhe në borde tjera, por kishe pohuar se janë profesionalë e ekspertë, dhe të tillët mund të jenë nëpër parti politike.
‘E treta e vërteta’, për Gazin
Gazmendi ishte një prej kandidatëve për kryetar Komune në Kosovë, që edhe pse humbi dy herë ai nuk u zbraps dhe fitoi me rregullin ‘e treta e vërteta’.
Muhaxheri humbi dy herë kur konkurronte nën flamurin e ish-Partisë Reformiste ‘ORA’. Por, nën pektun e LDK-së, Muhaxheri arriti të mposht më në fund Ali Berishën e AAK-së.
Gazmend Muhaxheri, është inxhinier i ndërtimtarisë. Ai mbajti pozita të larta publike përgjatë viteve. Ishte anëtar i Kryesisë së Kuvendit të Kosovës dhe deputet i Partisë Reformiste ‘ORA’, prej vitit 2004 deri më 2007.
Pastaj, nga muaji shkurt i vitit 2010 deri në maj të 2011-ës, Muhaxheri udhëhoqi drejtorinë e Urbanizmit, deri sa kaloi dhe në strukturat e LDK-së. /tesheshi.com/
