Nga Mensur Krasniqi
“Sopoti”, “Monstra”, “Kumanova”…po përse të mos jetë dhe Burhan Seferi?
32-vjeçari nga Shkupi që prej muajsh po qëndron prapa hekurave të burgut të Shtipit, 100 km qytetit të tij, është ndër “viktimat” e aksionit të pretenduar ai antiterrorist të ashtëquajtur “Celular”. E veçanta e tij është ka shkuar e është dorëzuar vetë, jo se e ka ndjerë veten të fajshëm, porse siç thonë të afërmit e tij e ka bërë në mënyrë që t’i shmanget kurthit që ia kishte përgatitur shteti maqedonas për ta dënuar ashpërsisht për mosprezencë.
Ironikisht, ai ka dhe një të veçantë tjetër: si i arrestuar për terrorizëm ai nuk ka mjekër të gjatë. Sepse dihet tashmë lidhja e krijuar në laboatorët mediatikë mes mjekrës dhe terrorit, pavarërisht se jo të gjithë mjekërmbajtësit u shenjohet terrori si zeje jete.
Pas dorëzimit të tij, gjykata Seferit i ka dhënë mundësinë e kompromisit që të zgjedh në mes ujdisë që të pranojë fajin dhe ta kalojë me një dënim më të lehtë, ose të gjykohet më rëndë në rast se refuzon ujdinë. Dhe jorastësisht si “shpërblim” nga shteti për pranimin e fajit, në vend që të vuajë burgun mbi 5 vite e më lart si të dënuarit tjerë, ai është i dënuar me 2 vite e 8 muaj burgim.
Ndërkohë. veprat penale për të cilat është akuzuar Burhan Seferi në aktakuzë nga Prokuroria publike, asnjëherë nuk janë vërtetuar nga Gjykata, me asnjë argument juridik apo faktik.
Ndërkohë, Prokuror në dosjen e Seferit ka qenë Vlladimir Milloshevski, emri i të cilit është dëgjuar në përgjimet ilegale të liderit të LSDM-së, Zoran Zaev për montime të proceseve gjyqësore.
Një fakt tjetër interesant janë ditët e 2 aksioneve policore për terrorizëm dhe radikalizëm islamik nga ana e policisë “Celula 1” dhe “Celula 2”, të cilat përkonin me ardhjen e përfaqësuesve ndërkombëtarë në Maqedoni, në mesin e të cilëve njëherë ishte edhe Ndihmës/Sekretarja e shtetit të SHBA-së, Viktoria Nuland.
Me këtë sipas miqve të afërmëve të Seferit, shteti maqedonas ka dashur të tërheq vëmendjen nga kriza politike e vendit, dhe njëherit të dëshmojë se po lufton kundër elementëve radikalë.
Por kujtojmë se emri i Burhan Seferit asnjëherë nuk është përmendur për dosje kriminale apo si person problematik. Ai në opinion e më gjërë më së shumti shquhet si njohës i mirë i politikës për Lindjen e Mesme dhe ideologjisë së sekteve. Dhe falë përgatitjes së tij në këto lëmi, ai ka dhjetëra shkrime me analiza politike vendore dhe ndërkombëtare të publikuara nëpër gazeta dhe mediume elektronike.
Ndaj dhe kur përmenden “Sopoti”, “Monstra”, “Kumanova”, nuk ka përse mos përfshihet në to edhe Burhan Seferi! /tesheshi.com/
