Edhe pse është diplomuar në gjuhën angleze si arsim i lartë primar, emërimi i Arben Ahmetajt si ministër i Financave në ditën e sotme, nuk është jashtë eksperiencës së tij.
Kjo pasi Ahmetaj ka punuar në dikasterin ku vilen të ardhurat e shtetit dhe kontrollohen shpenzimet që në vitin 1992.
Ministri i atëhershëm i Financave, Genc Ruli do ta thërriste Ahmetajn të punonte pranë tij, si pasojë e nevojës për ekspertë të rinj që flisnin gjuhën angleze për t’u përshtatur me marrëdhëniet e reja ndërkombëtare por edhe me institucionet financiare botërore.
Në këtë kohë, Arben Ahmetaj punoi dhe në një projekt të Departamentit të Thesarit të Shteteve të Bashkuara të Amerikës në Shqipëri, i cili kishte mision për të ndihmuar në transformimin e finanancve shqiptare, nga një shtet komunist në një ekonomi tregu.
Ishte koha kur Sali Berisha ishte president i vendit dhe njeriu që kontrollonte totalisht qeverisjen e PD-së.
Pas kësaj ekperience, Fatos Nano kryeministër dhe Arben Malaj ministër i Financave, e thërrasin Arben Ahmetajn në postin e drejtorit të përgjithshëm i Tatimeve në vitin 1997 kur shteti ishte i falimentuar dhe kishte nevojë jetike për të mbushur buxhetin e zbrazur.
Dhe në këtë post, Arben Ahmetaj qëndroi për një kohë të gjatë kur tashmë buxheti doli nga emergjenca dhe nisën investimet publike në rrugë dhe infrastrukturë.
Në këtë kohë, Ahmetaj nga një teknokrat tërhiqet në botën e sipërmarrjes për t’u thirrur më pas nga Fatos Nano në qeverinë e ribërë të drejtuar nga ai, në fillim si zv.ministër i Integrimit dhe më pas si zv/Ministër i Ekonomisë dhe Energjetikës.
Pikërisht, biznesi i tij në fushën e telefonisë rajonale e futi Ahmetajn në hollinë e akuzave për konflikt interesi dhe abuzime me kompaninë e tij Hermes Comunications. Madje Ahmetaj ka një dosje edhe në prokurori për këtë çështje që hetohet nga Bilbil Mete, babai i Ervin Metes që Ahmetaj e ka pasur deri tani zv.ministër Ekonomie.
Por Ahmetaj në politikë erdhi pas një eksperience në Këshillin Bashkiak të Tiranës, ku si përfaqësues i socialistëve krijoi marrëdhënie bashkëpunimi me Edi Ramën, i cili e thirri Ahmetajn në ekipin e ri opozitar pasi Rama zgjidhet në krye të selisë rozë.
Gjatë 8 viteve në opozitë, Ahmetaj zgjidhet një herë deputet i Tiranës e më pas në qarkun e Gjirokastrës. Pas zgjedhjes së tij si ministër i Ekonomisë dhe Sipërmarrjes, ai lë mandatin e deputetit dhe i kushtohet punës me biznesin ku harton ligjin për fasonët dhe nis një fushatë lobimi për të thithur investime të mëdha të huaja në vend.
Qëndrimi në krah të Edi Ramës ka dhënë gjithnjë përshtypjen se Ahmetaj është një nga bashkëpunëtorët më të afërt të kryeministrit në kabinet. Ndaj dhe emërimi në postin e ministrit të Financave është brenda kësaj dialektike.
Ndërkaq, përveç arsimit në gjuhë dhe letërsinë angleze, Arben Ahmetaj është doktoruar për Sigurinë Energjitike, ndërkohë që ka kryer studimet master për tregti ndërkombëtare dhe diplomaci në Universitetin e Kentucky-t, SHBA.
Ka kryer projekte kërkimore për Financë Ndërkombëtare dhe Tregje Financiare Ndërkombëtare në Universitetin e Harvardit, SHBA (1999- 2000); Për Menaxhimin e Politikave Ekonomike Publike, në departamentin e Ekonomisë, në Universitetin George Uashington, Edmund Walsh School of Foreign Service, Ëashington, SHBA, si dhe për Menaxhimin e Konflikteve në Epokën e Teknologjisë së Informacionit, Athinë (2004)
Zotëron shumë mirë gjuhët angleze, italiane, greke dhe është njohës i gjuhës ruse.
Arben Ahmetaj është i martuar me znj. Albina Mançka, dhe ka dy vajza, Livia dhe Kejsi. /tesheshi.com/
