Andrej Sisko është udhëheqësi i grupit paraushtarak të “Gardës së Stirit”, i cili, i armatosur dhe i maskuar, kryen stërvitje ushtarake 40 kilometra larg kufirit kroat me qëllim që të “mbrojë Slloveninë nga emigrantët”. Ai ka qenë gjithnjë një njeri polemik për shoqërinë sllovene, dhe politika, ushtria, futbolli dhe krimi ndërthuren në jetën e tij.
Ai u bë i diskutueshëm që i ri pasi themeloi Organizatën Antikomuniste të Sllovenisë dhe krahun ushtarak të Ushtrisë Çlirimtare Sllovene dhe më vonë Frontin për Slloveninë e Pavarur.
Gjatë luftës, ai organizoi Gardën Sllovene, e cila bashkëpunoi me shërbimin e inteligjencës së Mbrojtjes Territoriale.
Ai ka qenë në burg disa herë, herën e parë gjatë ish-Jugosllavisë, sepse u grind me një komandant të lartë të Ushtrisë. Ndërsa për herë të dytë pas një procesi gjyqësor 14-vjeçar mbi vrasjen e mbetur në tentativë të sipërmarrësit Milan Clement.
Ai përfundoi në burg për herë të tretë në fund të vitit të kaluar pas thirrjeve për një ndryshim të dhunshëm të Kushtetutës.
Para se të dilte nga burgu, ai u vizitua nga Borut Pahor për ta bindur se Partia Popullit Slloven nuk do mbledhte nënshkrime për referendumin mbi pranimin e Sllovenisë në NATO. Një tjetër lidhje midis Sisko-s dhe NATO-s është kundërshtimi i hapur i tij ndaj hyrjes së Kroacisë në Aleancë.
Sisko gjithashtu dëshironte të ishte president i Sllovenisë, kështu që garoi në zgjedhjet e vitit 2017, ku fitoi vetëm 2.21 përqind të votave. Gjatë gjithë fushatës së tij, ai mbante një kapelë të kuqe bejsbolli, ashtu si Donald Trump, dhe madje deklaroi se “e shikonte problemin e migrantëve ngjashëm si Trump”.
Ai aktualisht është kreu i partisë së ekstremit të djathtë Lëvizja për një Slloveni të Bashkuar, dhe në 14 vitet e fundit ai ka qenë edhe kreu i Hervardit, një lëvizje nacionaliste që promovon teorinë e “origjinës veneciane të sllovenëve”.
“Styrian Guard”, për të cilën ai pretendon se nuk është një organizatë paramilitare, por “një grup njerëzish që mbrojnë vendin e tyre nga emigrantët”, u themelua vitin e kaluar. Ai e justifikoi krijimin e saj duke pretenduar se Kushtetuta sllovene lejon të drejtën e vetë-organizimit.
“Për shkak se çdo vend duhet të ketë forcat e veta të mbrojtjes dhe të sigurisë, të afta për të siguruar ligjin dhe rendin dhe kontrollin kufitar, ne kemi krijuar Gardën e Stirit”, tha ai, duke shtuar se grupi kishte armë zjarri dhe nuk kishte nevojë për leje. “E drejta për të mbajtur dhe mbajtur armët është një e drejtë themelore e njeriut”.
Vitin e kaluar, Reporter i Sllovenisë shkruajti se ajo çfarë ofronte garda e tij ishte identike me paramilitarët Arkanit në vitet ’90. Ndërkohë, një tjetër lidhje midis Arkan dhe Sisko-s është futbolli. Konkretisht, Sisko ka qenë drejtuesi i Viola-s, një grupim tifozerie i Mariborit në Slloveni.
Organizata të tilla marrin gjithashtu mbështetje publike nga njerëz me mendje të njëjtë, siç është një 64-vjeçar nga Krmacina, i cili tha se 13 algjerianë i vodhën një furgon në oborr.
Edhe pse ka kundërshtarë të gardës së Sisko-s, ata druajnë të flasin haptazi për publikun slloven. /tesheshi.com/
