Nga Ylli Pata
Shqiptarët janë ngarkuar shumë këto kohë me modele politikanësh e zyrtarësh me pamje dhe sjellje të egër, cinike, ofensive që nuk bëjnë gjë tjetër sapo dalin përpara kameras e vetëm vjellin vrer ndaj atyre që i konsiderojnë kundërshtarë apo rivalë.
Zyrtarë që sillen keq me qytetarët, ndërkohë që ngasin makina të shtrenjta dhe jetojnë në luks.
Por në rrugët e Tiranës, ashtu në këmbë, mund të hasësh normalisht edhe shembuj zyrtarësh, që para se te jenë të tillë, kështu kanë qenë që kur janë formuar: qytetarë model.
Një nga ata, është padyshim Agim Fagu, kampion legjendar i sportit shqiptar në basketbollin e meshkujve të Partizanit dhe kombëtares kuqezi në vitet ’70, por që u përpoq të sjellë qytetarinw edhe në tranzicionin e vrullshëm të pas viteve ‘90 si politikan dhe zyrtar i shtetit.
E has mes miqsh, ndër ta dhe profesor Përparim Kabon, që bisedojnë për pasionin e përbashkët-sportin, por edhe për politikën.
Kur e pyet për një analizë mbi situatën aktuale në rajon me anëtarësimin e Malit të Zi në NATO, profesor Fagu me delikatesë thotë se ende është diplomat dhe detyra e tij është të hartojë raporte dhe analiza për shtetin dhe jo për publikun.
E në fakt, ai ka shumë për të thënë pasi ka qenë njeriu kyç që ka lobuar në të gjitha kancelaritë e anëtarëve të Aleancës së Atlantikut të Veriut që sollën vendimin e 2009-ës, kur Shqipëria u bë anëtare me të drejta të plota në NATO.
‘“Nuk është tamam ashtu – përgjigjet Fagu – janë shqiptarët në NATO”; dhe si diplomat tërhiqet sërish duke përshendetur gjithë mirësjellje.
Ditët e bisedimeve për anëtarësim në NATO, nga viti 2006 deri 2008 i kam ndjekur ngushtësisht si reporter diplomatik në të përditshmen “Shqip”.
Hapa disa shënime nga materialet që kisha grumbulluar për NATO-n dhe gjej deklaratat e një ish-ambasadori që më tregoi mbi problemet që ka pasur realisht anëtarësimi në NATO në 2008-n.
I sapoplasur Gërdeci, edhe pse opozita nuk sulmoi qeverinë, disa shtete europiane frikësoheshin se Berisha do ta përdorë anëtarësimin në Aleancë për të rritur pushtetin personal. Dhe realisht nuk gaboheshin shumë. Ndërsa Greqia kishte kushte të tjera.
Të gjitha negociatat e tjera janë drejtuar nga grupi i NATO-s në MPJ i kryesuar nga Agim Fagu.
Sot ai është një diplomat i graduar, por i paangazhuar ndërkohë që vendi ka nevojë për lobistë dhe negociatorë të shkëlqyer për të rritur imazhin dhe sjellë investime.
Ai është një model brilant për një zyrtar shteti në kohën kur politika sjell shembujsh të fortësh dhe figura butaforike që mbushin rrjete sociale me dokrra të tipit N.N apo politikaj që lëshojnë vetëm vrer e sharje.
Pikërisht, backraundi i kampionit diplomat është një dëshmi e pozitivitetit që krijon shembull për shoqërinë.
Agim Fagu pasi e mbylli karrierën e sportistit hyri në politikë pa qenë asnjëherë një protagonist, por ama kudo ku vendosi emrin e tij la gjurmë pozitive.
Garoi për kryebashkiak të Tiranës në vitin 1996 me propozimin e PS-së, nuk fitoi por u soll si xhentellmen, edhe pse pati manipulime.
Kur socialistët erdhën në pushtet në vitin 1997 e emëruan si ambasador në Londër, për të dërguar në vendin e qibarëve një “zotëri Tirane”.
Dhe në kryeqytetin britanik Agim Fagu u bë diplomati që hapi ambasadën për të gjithë shqiptarët, pikërisht në kohën kur shpërtheu lufta e Kosovës.
Çdo aktivitet dhe manifestim kordinohej së bashku me ndihmën e pakursyer të kampionit diplomat. Pas rikthimit në Tiranë, emërohet drejtor i integtrimit në NATO dhe drejtoi negociatat e vështira për të bindur skeptikët për anëtarësimin e Shqipërisë.
Kur si ambasador i Shqipërisë në Londër do të takohej me Madhërinë e Saj, Mbretëreshën Elisabet për të paraqitur letrat kredenciale, takimi si rrallë herë ka zgjatur më shumë duke thyer protokollin e ngurtë të Buckingham Palace.
Ai nuk këputi ndonjë thagmë si paraardhësi i tij që i tha Mbretëreshës që nuk sipatizonte Monarkinë apo ndonjë mufkë që do të mbushte tabloidët një ditë më pas.
Agim Fagu çuditi se solli një imazh ndryshe nga Shqipëria, jo si “diplomatët me tuta” që iu vërsulën grabitjeve si pas 97-ës apo zyrtarëve që hapnin problem për çdo kancelari.
Por një model si Agim Fagu, ende nuk është në modë në Shqipërinë që po përcëllohet të bëjë reformë në drejtësi që të largojë të korruptuarit, ku për diplomat gradohen ca 25-vjeçarë që mbajnë në xhep jo një por dyshtetësi, e që më pas dalin se nuk kanë kryer as shërbimin ushtarak në Greqi….
/tesheshi.com/
