Federata Ndërkombëtare e Gjimnastikës (FIG) ka njoftuar se do të fillojë procedimin disiplinor kundër garuesit rus në gjimnastikë ritmike Ivan Kulijak për “sjellje tronditëse” kur ai shfaqi një simbol ushtarak në mbështetje të pushtimit rus të Ukrainës gjatë një gare.
20-vjeçari, i cili ishte i treti në tezgjahun paralel të kompeticionit të Kupës së Botës në kryeqytetin e Katarit Doha të shtunën, kishte një shkronjë të spikatur “Z” në pjesën e përparme të kostumit të garës, ndërsa qëndronte pranë konkurrentit ukrainas Ilija Kovtun që fitoi medaljen e artë në Katar.
Forcat ruse përdorin shkronjën “Z” si një simbol identifikimi në tanke dhe automjete në Ukrainë gjatë pushtimit aktual të Moskës ndaj fqinjit të saj. Disa mbështetës të pushtimit tregojnë gjithashtu këtë shenjë.
“Federata Ndërkombëtare e Gjimnastikës konfirmon se do t’i kërkojë Fondacionit të Etikës së Gjimnastikës që të hapë procedurat kundër Kulijakut pas sjelljes së tij tronditëse,” tha FIG në një deklaratë.
Rusia i quan veprimet e saj në Ukrainë një “operacion special”, qëllimi i të cilit nuk është të pushtojë territorin, por të shkatërrojë kapacitetet ushtarake të fqinjëve të saj dhe të eliminojë, siç thotë ajo, “nacionalistët e rrezikshëm”.
Më parë, FIG anuloi dy nga garat e saj në Rusi dhe Bjellorusi, duke shtuar se nuk do të zhvillojë turne atje deri në një njoftim të dytë.
Bjellorusia është një pikënisje kyçe për forcat ruse. /tesheshi.com/
