Gratë që pretendojnë se me to është abuzuar seksualisht nga Jeffrey Epstein, në një sallë gjyqi në Nju Jork treguan zemërimin dhe trishtimin e tyre, më pak se tre javë pasi miliarderi u vetëmbyt ndërsa priste gjyqin për trafik seksi.
“Ai është frikacak. Ndihem shumë e zemëruar dhe e trishtuar sepse drejtësia nuk është vendosur në këtë rast”, tha Courtney Wild në seancën dëgjimore para gjyqtarit Richard Berman.
“Unë nuk do ta lë atë të fitojë në vdekje”, tha një viktimë tjetër, Chauntae Davies.
Prokurorët federalë u paraqitën në seancë për t’i kërkuar gjykatësit që të pezullojë zyrtarisht çështjen kundër Epstein.
Berman shpjegoi se viktimat u thirrën të martën për shkak të “përvojës së tyre të rëndësishme” dhe për shkak se ata duhej të përfshiheshin në proces që nga fillimi.
Epstein, miqtë e të cilit janë presidenti aktual Donald Trump dhe ish-presidenti Bill Klinton, u arrestua në 6 korrik.
Ai u gjet i vdekur më 10 gusht në një qeli në një burg në Manhattan dhe autopsia tregoi se ai kishte varur veten.
Prokurorja Maurene Comey, vajza e ish drejtorit të FBI-së James Comey, tha në seancë se ligji kërkon pushimin e çështjes për vdekjen e Epstein, por hetimi i qeverisë po vazhdon.
“Heqja e aktakuzës kundër Jeffrey Epstein në asnjë mënyrë nuk e ndalon ose pengon hetimin e vazhdueshëm të komplotuesve të mundshëm”, tha Comey.
Vdekja e Epsteinit po hetohet nga FBI, Departamenti i Drejtësisë dhe Agjensia e Burgjeve të SHBA.
Pas vetëvrasjes së tij, shumë viktima kërkuan kompensim nga pasuritë e miliarderit me vlerë më shumë se 557 milion dollarë.
Vetëm disa ditë para vdekjes së tij, Epstein hartoi një testament për të lënë të gjitha pasuritë e tij në fondacion. /tesheshi.com/
