Mensur Krasniqi
Njëzet e nëntë të akuzuarit e rastit të Kumanovës në Lagjen e Trimave, sot kaluan disa orë në bankën e të akuzuarve në Gjykatën e Lartë në Shkup. Të gjithë këta akuzohen për terrorizëm dhe si pjesëmarrës në organizatë terroriste.
Prokurori Naum Panovski pas leximit të aktakuzës ka deklaruar se në bazë të dëshmive në dispozicion të prokurorisë, gjatë procesit do të provohet se të pandehurit me dashje dhe në mënyrë direkte e kanë kryer veprën e tyre.
Në fillim të procesit të gjykimit për ngjarjet e Kumanovës në “Lagjen e Trimave” avokatët mbrojtës të akuzuarve kanë kërkuar shtyrjen e seancës.
Përveç tjerash avkoatët kanë kërkuar që rastin në fjalë ta procesojë Prokurorja speciale, Katica Janeva.
Këtë kërkesë të tyre gjykata e hodhi poshtë për arsye se Prokurorja Publike Speciale, Katica Janeva deri tani nuk ka dorëzuar një kërkesë për të marrë këtë rast, dhe as ka treguar interes për të.
Ndërkaq i akuzuari Sami Ukshini, i njohur si komandant Sokoli, ka theksuar se nuk ndjehet fajtor për veprat penale që po i ngarkohen./tesheshi.com/
