Në gjykatën themelore të Ferizajt, është mbajtur seanca e radhës në ngarkim të djalit të kryeministrit Isa Mustafa, Besnikut, i cili akuzohet për vepra penale të lidhura me një fluturim të anuluar të vitit 2009 në aeroportin e Prishtinës.
Por, ajo që bie në sy janë deklaratat e avokatit të Besnik Mustafës, për të cilin, ai është diskriminuar nga Drejtësia pasi është djali I kryeministrit të vendit.
Avokati Besnik Berisha këmbënguli në proces se Drejtësia po dëshmon të jetë selective pasi, “në bazë të fakteve del se Prokurori e ka akuzuar Besnik Mustafën sepse ka qenë djali i Isa Mustafës e jo se ka kryer ndonjë vepër penale”.
Prokurori special Ali Rexha që ka hetuar rastin, e ka mohuar këtë pretendim, duke thënë se në proces ka edhe të akuzuar të tjerë dhe se në kohën e hetimeve nuk ka qenë Isa Mustafa fare kryeministër.
Besnik Mustafa, si menaxher i bankës për Biznes, akuzohet për keqpërdorim të detyrës zyrtare dhe falsifikim të dokumentit zyrtar, të një garancie bankare për pasagjerët. Bashkë me të, gjykohen edhe gjashtë persona të tjerë, mes të cilëve disa ish-zyrtarë të MTPT-së. /tesheshi.com/
